Truck tlan ngamna kawng siam phût

MNF party chuan thuchhuah siamin, Vairengte-Sairang inkar kawng chhiat lutuk avangin vawiin aṭangin truck-te an tlan ngam dawn lo tih an tarlang a; truck tlan ngamna tura siam thuai turin Mizoram sorkar an phût.

MNF chuan, Mizoram Truck Owners' Association (MTOA) leh Mizoram Truck Drivers' Association (MTDA)-te'n kawng chhe lutuk vanga an tlan ngam loh thu an chhuah chu lungchhiatthlak an tih thu tarlangin, "Mizoram sorkar inthlahdah vangah ngaiin, sorkar chu a rang thei ang bera kawng chhiate siamṭha thuai turin kan phût," an ti.

PWD Minister-in kawng siamna tura sum awm thu a sawi reng lai te, hun eng emaw chen khaw ṭhat tawh hnu pawha kawng siam si lo, January 20, 2025 aṭang chauha Vairengte-Sairang inkar kawng siam tura PWD-in hma a la ṭan chauh chu sorkar inthlahdah lutuk vangah an ngaih thu MNF chuan an sawi.

MNF party chuan, PWD Minister chu chak taka hma la a, kawng chhe laite siam nghal zung zung tura an phût thu tarlangin, "Kawng siamna tura tuialhthei man uchuak taka chhiah an tihpunna sum tling khawm pawh a hmanna tur dik tak, truck tlan ngamna tura kawng siam nana hmang nghal turin chief minister Pu Lalduhoma kaihruai sorkar kan ngen," an ti a; ZPM sorkar chu an insawi ang ngeia mahni inhaivûr hmasa loa ram tan hna thawk hmasa turin an chah.