KHAWTHLIR

NSS-in thisen pe

Lungleia Higher and Technical Institute of Mizoram (HATIM) NSS unit leh Red Ribbon Club chuan Republic Day pualin nimin khan Lunglei Civil Hospital tan thisen unit 89 an pe a, petute mipa 61 leh hmeichhia 28 an ni.

IPS officer sîksawi

Mizoram sorkar chuan January 21, Thawhlehni khan order chhuahin, Indian Police Service (IPS) officer pahnih a sîksawi. Deputy inspector general (Headquarters) H Ramthlengliana chu inspector general of police (Headquarters leh Law & Order) chang tura tih a ni a, AIG (Modernisation) Dingluaia chu DIG (CID) chang tura tih a ni.

Zakapa Award

Mizoram sorkar chuan, hmeichhe dinhmun chawikan leh hmeichhe zahawmna, dikna leh chanvo vên him kawnga thawh hlawkte tana buatsaih Zakapa Award chu March 8, 2025-a International Women's Day lawmnaah sem tum a nih thu a tarlang a, "Zakapa Award dawng thei tura mimal/pawl/institution hna thawk ṭha leh chawimawi phu nia hriatte February 14, 2025 hmain a thehluh theih a ni," a ti. Dilna thehluhna turte - email wcdmizoram@gmail.com, DC Office, Directorate of Women & Child Development, district programme office, WCD leh CDPO office. Award hian Rs. 1,00,000 a keng a ni.

Ṭanpuina hlan

People United in Music with a Purpose (PUMP) chuan tun hnaia charity concert an buatsaih aṭanga an hmuh Rs 3,10,300 chu January 21, Thawhlehni khan Mizoram State Cancer Institute (MSCI) hnenah an hlan. PUMP hian December, 2024 khan MSIC tan hian charity concert tum tṭhum neiin, heta an sum hmuh zawng zawng hi an hlan a, tha thawhtute leh sum petu zawng zawngte hnenah lawmthu an sawi a ni.

Silk Showroom tlawh

Sericulture secretary Florence Zotluangpuii chuan nimin khan Sericulture department hnuaia cocoon dahṭhatna hmun leh Silk Showroom a tlawh a tlawh a; kut hnathawktute'n eizawnna ngêlnghet an neih theih nan leh an dinhmun chawisanna turin sericulture a pawimawh thu sawiin, theihtawp chhuaha thawk zel turin thawktute a chah. Sericulture Secretary hi director V Zothansanga leh hotu dangte'n an ṭawiawm a ni.

VC/LC thlan atan inbuatsaih mek

February 12, 2025-a village council leh local council inthlanpui awm turah inbuatsaihna ngawrh taka kalpui mek a ni. Inthlan inbuatsaihna atan hian inthlanna tur district pakuaah inthlan buaipuitu hrang hrangte tan training buatsaih mek a ni a, inthlan kaihhnawih thil pawimawhte leh mawhphurhnate inhrilhfiah a ni.