Kolasib DC-in March 31, 2025-ah kawngpui blacktop zo turin a chah

Kolasib bawrhsap Robert C Lalhmangaiha chuan, national highway enkawltu National Highways & Infrastructure Development Corporation Limited (NHIDCL) hnuaia kawng siamtu Balaji Constructions chu ruahmanna awm tawh ang ngeia March 31, 2025-ah kawngpui blacktop hna zo turin a chah.

District Bawrhsap ho hian nimin khan a pisaah sorkar hotu te, tlawmngai pawl, truck neitu pawl leh NHIDCL aiawhte'n NH-306 Kolasib-Kawnpui inkar kawngpui siam hna chak zawka thawh a nih theih dan tur te, hmalakna kal mek leh pawl ṭhenkhatte'n lungawi lohna an thlente an sawiho a ni.

Kolasib DC chuan, Kolasib-Kawnpui inkar kawng siamtu Balaji Constructions chu ruahmanna awm tawh ang ngeia March 31, 2025-ah blacktop hna zo hman turin a chah a, "Fûr a thlen hma ngeia kawngpui siam hna zawh a nih loh chuan mipui bakah, kawng siamtu company-te tan harsatna lian zawk a awm thei dawn a ni," a ti.

Robert C Lalhmangaiha chuan, "NH-306 hi Mizoram luhka pawimawh tak a nih angin Kolasib mipui mai ni lo, Mizoram mipui tan ni tin mamawh châwk luhna pawimawh a ni a, chumi chu hre reng chungin kawng siam hna chak zawka thawh a ṭul," a ti a; Balaji Constructions hotute chu thawktu leh hmanrua lak belh turin a hrilh.

Kawngpui siam mektute tana harsatna siamsak lo turin Bawrhsap chuan mipui a chah a, "Kawngpui ṭha tak siam a nih theih nan sorkar leh kawng siamtute'n theihtawp an chhuah a ni tih hriain, zaidawh takin awm ang u. Pawl anga lungawi lohna lantirna a awm pawhin mipui leh khawtlang nunphung tibuai lo zawnga tih ni thei se," a ti a; NH dangchat zawnga hmalakna emaw, mipui nunphung tibuai zawnga hmalakna awm lo se a duh thu a sawi.

Kolasib SP David H Lalthangliana chuan, chak tak leh ṭha taka NH kawng siam hna kalpui a nih theih nan lirthei kal dan vilpui tur leh a ṭul anga ṭanpui turin SP Office chu an inpeih reng thu a sawi a ni.

Nimina ṭhutkhawmah hian Kolasib Additional DC, NHIDCL leh Balaji Construction hotu te, Mizoram PWD hotu te, Sub-Hqrs YMA leh Joint Action Committee Mizoram Truck Owners Association hruaitute an tel.