Jail tángte thiam thil zir tur ngaihtuah

Mamit District Level Committee on Skill Development & Vocational Training chu nimin khan bawrhsap Dr Lalrozama hoin DC conference hall-ah an ṭhukhawm a, jail tángte thiam thil zirna tur chi hrang hrang an ngaihtuah.

Dr Lalrozama chuan, Mizoram Prison Manual, 2017 pararaph 15.04 zûlzuia duan, jail tángte tana thiam thil, jail aṭanga an chhuah hnua an chhawr ṭangkai theih tur zirtir a nih theihna tura department-te hmalakna chu lawmawm a tih thu a sawi a, "Jail tángte'n nun kawng dik an zawh theih nan hmanraw pawimawh tak a nih theih ka beisei," a ti.

ṭhutkhawmah hian Mamita Horticulture department-in training programme an duante thlirho a ni a, jail tángte chu pa (mushroom) khawi dan tur leh thlasik/ṭhál laia tomato, zîkhlûm, hmarcha, changkha leh bawrhsaibê chìn dan zirtir ni se, an ti. A ṭul dan anga bawhzui turin Horticulture department leh District Jail Superintendent-te an ruat nghal.

Mamit District KVI-in jail-a tángte chu khuai khawi dan, sahbawn tui siam dan leh mombati siam dan an zirtir ang a; training kalpui hun tur chu KVI-a demonstrator-te leh jail hotute'n an ruahman dawn a ni.