HTE Secretary-in HTE-a thawkte a fuih

Higher & Technical Education (HTE) department secretary H Lalengmawia chuan nimin khan HTE Directorate a tlawh a, fuihna thu a sawi bakah, department thil pawimawhte a sawipui.

H Lalengmawia chuan, Mizoramin zirtirtu ṭha a mamawh hle tih sawiin, "Zirtirtu ṭha nei tur chuan a enkawltu department-in zirtirtute hmakhua thlir thiam a ngai a, an tan theihtawp chhuaha thawh a ṭul," a ti a; HTE Directorate-a thawkte chu mipui rawngbawltu an nihna hre thar tur leh anmahni dawrtute ngaihsak ṭha turin a chah.

HTE Secretary chuan, HTE department-a thawkte chu mi inang lo tak tak ni mah se, inhrethiam tawn a, inngaihsak tlang tur leh an hna ṭheuh tikhawtlai loa mi dangte harsatna sukiang tura thawk turin a fuih a; "Kan hna ṭheuh hi a sang emaw, sang lo emaw, kan theih tâwk ṭheuh chhuaha kan thawh chuan mite'n min en hniam thei lo," a ti.

H Lalengmawia hi HTE joint secretary K Lalhmangaihzuala leh under secretary Zahmingliana ten an ṭawiawm a ni.