Khawzawl DC-in vawk lakluh a khap

Khawzawl DC K Vanlalṭhiana chuan African Swine Fever (ASF) leng mek avangin an district chhungah India ram pawn leh ram chhung state dang leh district dang aṭangin vawk, vawksa leh vawksa aṭanga siam thil reng reng lakluh leh thawn chhuah a khap.

Khawzawl DC chuan, "Tunlai hian Mizoram hmun ṭhenkhatah ASF natna leng mek chuan kian lam a la pan thei lo. He hri laka Khawzawl district mipuite kan fihlim theihna turin khapna thupek hi Section 163(1) BNSS, 2023 in thuneihna min pêk angin chhuah a ni," a ti.

Thupêk zawm lote chu Section 223 BNS hmanga hrem theih an ni ang. Khapna thupêk hian thupêk dang tihchhuah a awm a nih loh chuan, thupêk chhuah a nih aṭanga thla hnih chhung a huam dawn.

Khawzawl DC thupek dangte :

1. Vawk damlo reng reng talh leh hralh khap tlat a ni. Vawk damlo reng reng chu dah hran vat tur a ni a, vawk thi reng reng thuk taka phum bo tur a ni.

2. Vawk damlo leh thi a awmin District AH & Vety department official-te hnenah report vat thin tûr a ni.

3. Tualchhung vawk talh tur reng rengin vawk hrisel tha ngei a ni tih finfiahna competent authority aṭangin an nei ngei tur a ni.