Gas leh buhfai tihbawrhbân tumte lakah Dan anga hmalak tur a ni - CM

Nimin khan Police headquarters-a Arya Mess-ah chief minister Lal Thanhawla'n police officer-te a kâwm a; Chief Minister chuan, gas leh buhfai tihbawrhbân tumte lakah dan anga hma lak tur a nih thu a sawi.

CM Lal Thanhawla chuan, tunlaiin mi ṭhenkhat kawmmawh bâwl ṭhin an awm tih sawiin, "Mipuite ni tin mamawh gas leh buhfai phurh lo tihbawrhbân tumte lakah dan anga hmalak tur a ni. Dan kenkawhna lamah tumah thlei bik nei loin, mihring chanvo dikna zah chunga hna thawkin, mi zawng zawng dan hnuaiah ang khat vek kan nih hriat reng tur a ni," a ti.

Lal Thanhawla chuan, police-te chu hun harsa leh hlauhawm, mamawh hun lai, engtia tih tur nge tih mi dangin an hriat loh laia ṭanpui vartu hnai reng an nih thu a sawi a; mipuite ṭhian an ni tih hre nawn fo tur leh dan leh hrai kengkawhtu pawimawh tak an ni tih hre reng turin police-te a chah.

CM Hawla chuan, sorkar laipui aṭanga hmuh Modernization of Police Forces hnuaiah nasa taka hmalak tawhnain rah ṭha chhuah chho zel tura ngaih a nih thu a sawi a, "Sual hnu chhui kawngah pawh tunlai thiamna thar thuam chhoh ve zel an ni. Tunah phei chuan forensic science lamahte leh digital electronic technology-te hmangin CCTV-te'n thuam chhoh a ni tawh," a ti.

Home minister R Lalzirliana pawhin thu sawiin, police-te chu sorkar hna-thawk dang angin an awm ve em tih ngaihtuah fo turin a chah a, "Inthlahdah miah loin mipuite thlamuang taka an awm theih nana thawktu in ni tih in hiat reng a ngai," tiin, an mawhphurhnate hlen a, zah leh chawimawi tlaka thawk zel turin a a fuih.

Inkhawmah hian DGP Thianghlima Pachuau pawhin thu a sawi a; IGP Zorammawia'n police-te hnathawh dan hrang hrang leh hmunhmate a lem nen a sawifiah a ni.