KHAWTHLIR

Luman hlân

August 4, 2015-a Jammu & kashmir-a mi firfiakte beihnaa thi, Lalramchhana, 42 Rashtriya Rifles (a awmna tak 7 Assam Regiment) râlna/luman (ex-gratia) Rs. 5,00,000 chu nimin khan Mizoram sorkarin a hlân. Râlna sum hi Mizoram sorkar aiawhin Sainik Welfare & Resettlement director Lt.Surg.Cdr. Lalnuntluanga'n a pisaah Lalramchhana nu Lalbiakhluni, Ratu hnenah a hlan a ni.

Mei zu man

Lawngtlai District Anti-Tobacco Squad chuan, nimin khan Lawngtlai khawpuia bazar hmun hrang hrang tlawh kualin squad drive an nei a; phal lohna hmuna mei zu mi 29 an man.

Meizial man zat

Legal Metrology, CID (Crime) leh National Tobaco Control Society, Mizoram ṭangkawp chuan October 2015
aṭanga kumin August 17 thleng khan dan phal loa Mizorama meizial lak luh cheng nuai 32.61 chuang hû man an man. Meizial an man neitute chu a tam dan azirin pawisa chawitir an ṭhin a ni.

Dân zâwm turin hriattir

Serchhipa Land revenue & Settlement department-a Assistant Settlement Officer chuan thuchhuah siamin, an district chhunga ram inpek dan turah hriattirna a chhuah a; khaw tina thuneitute leh mipuite chu sorkar dan ang zela engkim kalpui turin a hriattir.

MDC lalut

Mara Autonomous District Council (MADC)-a nominated seat luah turin nimin khan K Mahei-a (Congress party) chu rinawmna thu tiam tira lak luh a ni. MADC-a nominated seat-a ruat Khaitha chu tun hnaiah a thih avangin a hmun ruak hnawhkhat turin K Mahei hi lakluh a ni.

Eng awm dawn lo

Zuangtui 33KV Sub-Station aṭanga Aizawl Power House-a 33KV Indoor Sub-Station-a kawlphetha pekna hruipui chu vawiin hian thlak chhunzawm a nih dawn avangin, Aizawl Power House-in a chawm - Electric Veng, Chhinga Veng, Dawrpui, Zarkawt, Chanmari, Tuikual South hmun ṭhenkhat, Treasury Square, Chaltlang Dawrkawn leh a chhehvel, Ramhlun PWD mual leh Laipuitlang-te chuan zing dar 6-10 inkarah power supply an nei dawn lo.