Girl Child Day pualin hun hmang

National Girl Child Day (January 24) leh Beti Bachao Beti Padhao (BBBP) kum 10 tlin lawmna pualin nimin khan Serchhipah kawngzawh huaihawt a ni a; Mamitah high school zirlai hmeichhiate tan volleyball-a inelna buatsaih a ni bawk.

Serchhip ICDS Project huaihawta kawngzawhah hian thupui chu 'Walk for the girl child' tih a ni a; child development project officer Caryll Lalpari'n thu sawiin, POSHAN coordinator Lalnundiki Ralte kaihhruaiin hmeichhe naupang humhim tura intiamna thu sawi rual a ni.

Kawngzawhah hian Women and Child Development department hnuaia office hrang hrang - DPO, OSC, Shakti Sadan leh anganwadi worker & helper-te leh District Child Protection Unit hnuaia thawktute an tel.

Mamit District Hub for Empowerment of Women chuan National Girl Child Day leh BBBP pualin ni khat awh high school zirlai hmeichhiate pual volleyball inelna an buatsaih a, deputy DPC H Lalrosanga a hawng.

H Lalrosanga chuan, hmeichhiate chu sikul luhna chungchangah hmeichhia an nih avanga harsatna an neih chuan School Education department hnenah thlen ṭhin tur leh, social media hman kawngah hmeichhiate chu awlsam taka hmingchhe thei an nih avangin fimkhur turin a chah.