Rs 2,98,04,250 hû ruihhlo hâl

Mamit District Drug Disposal Committee hma­lak­nain Mamit district-a ruihhlo man, thubuai chinfel tawhte chu nimin khan Mamit District Hospital incinerator-ah hâl ral a ni. Hâl ralna hun hi district bawrhsap K Laltlawmlova leh Mamit SP Pukhraj Kamal ten an hmanpui.

Mamita ruihhlo hâlte chu heroin, methamphetamine leh ganja a ni a; a vaiin Rs 2,98,04,250 hûa chhût a ni.

K Laltlawmlova chuan, Mamit SP leh a thawhpuite'n ruihhlo donaa theihtawp an chhuah leh ruihhlo an man ṭhin chu fakawm a tih thu a sawi a; ruihhlo donaah theihtawp chhuah zel tura thawktute a fuih rualin, ruihhlo donaah ṭhahnemngai taka sorkar mite thawhpui turin YMA leh tlawmngai pawl dangte a chah.