KHAWTHLIR

Chawlh puang

Mizoram sorkar chuan local council inthlanpui neih ni tur, February 12, 2025 chu Aizawl Municipal Corporation leh Lunglei Municipal Council chhunga central/state sorkar hnathawk te, public undertaking, zirna-in leh bank hnuaia thawkte tan chawlhah a puang.

AR-in meizial man

Assam Rifles chuan January 20, 2025 khan Hnahthial district-a Tuichang leiah ram dang meizial báwmpui (case) 260 an man a, cheng vbc 3.38 hû man a ni a; Champhai Jail Vengah cheng nuai 22.10 hû foreign cigarette báwmpui 17 an man bawk.

NMBA hmalakna

Hnahthial district Nasha Mukt Bharat Abhiyaan (NMBA) Committee chuan nimin khan district bawrhsap Rita Lalnunmawii Pachuau hoin ruihhlo do beihpui thlakna, Nasha Mukt Bharat Abhiyaan kalpui tawh dan leh hmachhawpte an sawiho. Hnahthial district-ah Excise & Narcotics office a awm tawh avangin END inspector chu NMBA Committee member atan an ruat nghal a ni.

IAS kai sang

Mizoram sorkar hnuaia thawk mek Indian Administrative Service (IAS) officer pahnih Dr Lalzirmawia Chhangte (AMGUT: 2009) leh Dr Lalrozama (AMGUT: 2009) te chu secretary aṭangin commissioner & secretary-ah tun hnai khan an kai sang.

Drugs awareness

Hnahthiala Excise & Narcotics department chuan nimin khan DC conference hall-ah Hnahthial district-a high school leh higher secondary school zirlaite pualin ruihhlo ti lo tura inzirtirna, Drugs Awareness Campaign an buatsaih a, Hnahthial END officer-in-charge inspector C Lianchungnunga'n a hawng. YMA Sub-Headquarters, Hnahthial president Hmingthanzuala'n ruihhlo ṭhat lohna hrang hrang a sawi a; naupangte chu ruihhlo ti chhin lo tura intiamin hming an ziak a ni.