Lunglei MJA-in inkhawmpui an hmang

Mizoram Journalists' Association (MJA), Lunglei District chuan January 22, Nilaini khan Lunglei Press Club-ah kum 2025 atana inhlan tharna leh Annual Conference an hmang a; Lungleia IPRO C Lalhruaitluanga'n a hmanpui.

C Lalhruaitluanga chuan, MJA member-te chu chanchinbu tihchhuah leh thuthar thehdarhnaah ṭan la zel tur leh digital media ṭhang zel mila inher rem turin a chah a, "Social media-a thu dik tâwk lo thehdarhte do lêt thei ber leh mipui leh sorkar pawhin thu lakna rintlak bera an la neih chu journalist-te in la ni reng," a ti a; ṭha taka sorkar thawhpui a, ram leh mipui tan ṭhahnemngai taka thawh zel a pawimawh thu a sawi.

Lunglei District MJA president Laltlanthanga pawhin thu sawiin, MJA member-te chu social media ṭhang chak tak karah mahni zawnah ṭheuh ṭan la tur leh mahni hnaa rinawm a, journalist hna zahawmna vawng nung zel turin a chah.

Inkhawm hi Lunglei MJA vice president PC Lalduhthlanga'n a kaihruai a; kum 2024-a Lunglei district MJA member thi pakhat sûnna hun hman niin, chawhnu lamah rorel a ni.

MJA, Lunglei District hi Lunglei Journalist Association (LJA) tiin kum 1972-ah din a ni a, December 1, 2006-ah MJA-ah inchhûng lutin, Lunglei District MJA tih a ni a, member 18 an awm mek.