FOCUS Exit Strategy meeting neih a ni

Fostering Climate Resilient Upland Farming System (FOCUS) project chu January 31, 2025 khian a tawp dawn a, hemi chungchangah hian nimin khan Champhaiah District Level Stakeholder’s Consultation (DLSC) Exit Strategy meeting leh Serchhipah FOCUS Exit Strategy meeting neih niin, loneitute hnenah FOCUS kaltlanga hmasawnna ruhrel dinte hlan a ni.

Champhaia DLSC Exit Strategy meeting chu bawrhsap VL Remliana'n a kaihruai a; FOCUS project chu beisei phak bakin a hlawhtlinga a hriat thu a sawi a, "Hlawhtlinna hi mahni koah ṭheuh a innghat a, rinawmna, taimakna leh tumruhna nen hna thawk zel ang che u," tiin farmer interest group (FIG)-te a chah.

Serchhipa FOCUS Exit Strategy meeting-ah bawrhsap Paul L khuma chuan, FOCUS kalpui a nih chhungin Serchhip district khaw hrang hrangah hmasawnna tam tak hmuh tur a awm thu leh loneih bànsana lo/huan nghet neia inlet mi eng emaw zat an awm chu FOCUS hlawhtlinna pho langtu a nih thu a sawi.

Champhai leh Serchhip-a FOCUS exit metting-ah hian an district chhung khaw hrang hranga loneitu intêlkhawm FIG-te hnenah FOCUS hmanga hmasawnna ruhrel dinte hlan a ni. An hlan zingah hian check dam, water tank, agriculture link road, horticulture link road, farm link road, ran chaw siamna (mini feed mill), nursery, lei (bridge), water harvesting structure leh a dangte a tel a ni.

FOCUS PROJECT LANGSAR ZUAL:

CHAMPHAI DISTRICT

◆ Khaw 60-ah kalpui niin, staff 43 an awm a, FIG 586 hnuaiah kut hnathawktu 10,382 an inziak lut.

◆ FOCUS hnuaiah line department pali - Agriculture, Horticulture, Soil & Water COnservation leh AH&Vety-te an awm.

◆ Line department kaltlangin thlai chi sem, vawk, ar leh kel note sem, Boar Semen Station din, tui dah khawlna siam, lei luang ral tur venna check dam siama hmalak a ni.

◆ Integrated Farming System hlawhtling takin Chhungte, Hmunhmelṭha leh Samthangahte kalpui a ni.

SERCHHIP DISTRICT

◆ Khumtungah loneitu chhungkaw 80-te balhla chintirin, thingtlang lo neih bànsanin huan nghet an nei tawh.

◆ Khaw hrang hrangah leilet nei chhungkaw 126-te leilet bial lian zawk siamsak a ni a, buh metric ton 147 an thar.

◆ Leilet nei chhungkaw 64-te chu leilet thar laihsakin, buh metric ton 42 an thar.

◆ Khawlailung, Thenzawl leh Hmunṭhaah chhungkaw 80-te chu dragonfruit chintir an ni a, tlang ram loneih an bànsan.

◆ Leilet neitute tan hmun hrang hrang 40-ah tuikawng siam a ni a, tuihna humhalh leh tihpun nan khaw 37-ah check dam siam a ni.

◆ Serchhipah ran chaw siamna bun a ni a; Hualtu, Rullam, Sialsir leh Lungchhuan khuaah IFS hmangin huan nghet nei turin chhungkaw 80-100 puih a ni.