KHAWTHLIR

Health department hnuaia State Vector Borne Disease Control Programme-a thawktu, malaria technical supervisor (MTS)-te tan nimin khan 'refresher training’ buatsaih a ni a, Health Services joint director (Malaria) Dr Lalhlimpuia'n a kaihruai. Health department-a district pakua aṭangin MTS-te an kal kim.

Aizawl Municipal Corporation (AMC) Ward-IX councillor B Lalawmpuii chuan nimin khan a biala local council-te chu Saron Vengah ko khawmin, bawlhhlawh paih dan kalpui mek a sawipui. B Lalawmpuii chuan, Solid Waste management Centre-ah bawlhhlawh paih a nih tawh avangin mipuiin an in ṭheuh aṭangin a ṭawih thei leh ṭawih thei lote an thliar hran sa vek a ngaih thu a sawi.

Nimin khan Mamit DC conference hall-ah District Fire Prevention Committee chu an chairman Dr Lalrozama, district bawrhsap kaihhruaiin an ṭhukhawm a, March 15, 2020 hmaa lo hâl vek turin an district-a V/C tin hnenah ngenna leh hriattirna pek vek ni se, an ti a; kângmei veng ṭha khua thlan an rêl bakah, kângmei vên chungchang inzirtirna YMA conference-a neih an rél bawk.

ZOFISFED chuan nimin khan Bungtlang khuaah sangha dil neitu leh sangha mantute tan skill development training an buatsaih a; sangha dil siam leh enkawl dan, fish culture (sangha khawi pawlh dan) leh common carp notê siam dan zirhona a ni. Chawhnu lamah field visit an nei nghal bawk.

SIPMIU chuan vawiin aṭang hian Zihnghal kâwn (IGC pêng) leh Ramrikawn inkarah pipe phûm hna an thawk dawn a, hei vang hian kawngpui hi a zatve khâr a ni dawn. 

Kulikawn Presbyterian Pastor Bial KṬP chuan nizan aṭang khan an kum 40 (Ruby Jubilee) tlin Kulikawn West biak-inah an lawm a; January 26 chawhnu inkhawmah hruaitu hluite pualin hun an hmang dawn a, hruaitu hlui ni tawh zawng zawngte tel turin an sawm.