Siahaah buhfai ip 153 man a ni

Siahaa Legal Metrology mite chuan nimin khan Siaha khaw chhunga dawrkaite buhfai zawrh an endik a, dawrkai 16 aṭangin buhfai ip páwna a rih zawng inziak lo leh bûk dik lo ip 153 an man.

Legal Metrology mite hian nikum khan buhfai in a nih dan tur ni lo leh bûk tling lo eng emaw zat an lo hmu chhuak tawh a; dawrkaite chu December 2024 ral hma ngeia inchingfel tur leh kum 2025 aṭang chuan buhfai ip páwn lama a rih zawng inziak lo chu chah lo tur leh zuar tawh lo turin lehkhain an hriattir a ni.

Nikum lama an hmalakna bawhzuiin Legal Metrology chuan tunlai hian buhfai ip siam chawp, a rih zawng tarlan loh, duh ang zat zata a man chhiar a hluar hle tih hriain hma an la a; mipui bumna a hluar avangin fimkhur turin mipui an chah.

Nimina buhfai mante chu Legal Metrology office-ah dah a ni a, a zuartute pawh nimin vek khan an ko bawk a, kar leh lamah chinfel tum a ni.