Minister-in State Food Commission-te an mawhphurhna hlen turin a chah

Food, Civil Supplies & Consumers Affairs (FCSCA) minister B Lalchhanzova chuan nimin khan a pisaah Mizoram State Food Commission (MSFC) member-te a kâwm a, an mawhphurhna hlen chhuak ngei turin a chah.

FCSCA Minister chuan, National Food Security Act, 2013 Section 16-in state tinah State Food Commission din a phût angin Mizoramah pawh October 2018-ah din a nih thu a sawi a, "Chhan hrang hrang avangin hun hmasa lam aṭang khan MSFC hi a nih tur ang ni pha lo leh a tih turte ti loin a awm ṭhin a, ZPM sorkar chuan siam dik a tum," a ti.

Dinhmun harsate'n an chanvo ration an chang em, bûk dikin an la em, thlei bik nei loin ration sem a ni em, eirukna eng emaw vangin chanvo chang lo an awm em tih leh a kaihhnawih thilte chu MSFC endik tur a nih thu sawiin B Lalchhanzova chuan, "Mawhphurhna hlen chhuak ngei turin theihtawp chhuah rawh u," a ti a; an thâ tichak turin sorkarin a puih zel dawn thu a hrilh.

Ṭhutkhawmnaah hian MSFC member secretary mumal taka ruat an awm chu siamṭhat ni se, tiin sorkarah rawtna theluh an rel. District-a mipuiin NFSA kaihhnawiha buhfai lak leh ration card chungchanga harsatna an neihte an thlenna tur District Grievance Redressal Officer atana The Mizoram Food Security Rules, 2017-in a ruat additional DC-te tan awareness leh training buatsaih an rel bawk.

Mipui nawlpuiin buhfai sem, ration card chungchang leh NFSA kaihhnawiha vuivaina an neih leh an hriat duhte an thlenna hmun tur an hriat theih nan inzirtirnate uar taka kalpui tum a nih thu sawi a ni.

MSFC hi an chairman HL Rochungnunga, IAS (Rtd)-in a ho a, minister B Lalchhanzova hi FCSCA secretary Teresy Vanlalhruaii, additional secretary Lalhmunsanga Hnamte leh director Saizikpuii ten an ṭawiawm a ni.