
LC/VC inthlan atana hming pekte endik
February 12, 2025-a village council leh local council inthlan awm tura chuh tuma hming pek luhte chu nimin khan endik a ni.
VC leh LC inthlan chuh tumte tana hming pek luh hun chu January 23, Ningani tlai dar 3 khan a tawp a, hming pek luhte chu nimin khan endik a ni. Nimin tlai thleng khan State Election Commission (SEC)-in report a la dawn kim loh avangin LC leh VC inthlan tura candidate awm zat tur hriat theih a la ni lo.
Inthlan chuh tura hming pek luhte endik hnua pawmte tan hian January 27, 2025 thleng inhnuhdawhna hun hawn a ni dawn a, inhnûkdâwk lote chu inthlanah candidate an ni dawn a ni.
VC leh LC inthlan hi autonomous district council (ADC) tih loh Mizoram hmun dang zawngah neih a ni dawn. VC 544-ah inthlan tur a ni a, seat 2,416 awmin, chu'ng zinga 613 chu hmeichhe tana hauh a ni. Aizawl Municipal Corporation leh Lunglei Municipal Council-in a huam chhina LC 111-ah inthlan a ni bawk ang.
VC ṭhenkhatah chuan chuhtu awm loin political party-te an tling dawn a, LC-ah erawh chuhtu awm loa an tlinna an awm hriat a ni lo. LC leh VC eng emaw zatah chuan Congress party leh MNF party an ṭang dun dawn a, state sorkara rorel lai ZPM party an beih rawn dawn a ni.