KHAWTHLIR

Thisen pe

Mission Foundation Movement hnuaia zirna-in pahnih, Laithangpuii College of Pharmacy leh General Duty Assistant zirlaite leh thawktute chuan nimin khan Civil Hospital Aizawl-ah thisen unit 53 an pe a, petute mipa 29 leh hmeichhia 24 an ni. Zirna-in pahnih hian Association for Voluntary Blood Donation ngen angin thisen an pe a ni.

Bial conference

Mizoram Presbyterian Kohhran hnuaia Kristian Ṭhalai Pawl (KṬP)-te chuan nizan khan bial hrang hrangah bial conference an ṭan. Nizan khan bial leh branch hrang hrang report ngaihthlak a ni a, vawiinah rorel a ni ang a, naktuk Pathianni zanah a ṭiak ang. KṬP bial conference hi January thlaa Pathianni hnuhnung ber behchhanin neih ṭhin a ni.

Jubilee lawm

Mizo Hnamro Chawisang Pawl, Dawrpui Jail Veng chuan nimin khan an kum 50-na, golden jubilee an lawm a, bialtu MLA B Lalchhanzova'n a hmanpui. Mizo Hnamro Chawisang Pawl hi January 4, 1975 khan nu leh pa leh ṭhalai kal khawmten 'Nun Siamṭha Pawl' tih hming puin an din a, January 28, 1977 khan Mizo Hnamro Chawisang Pawl tia thlak a ni a; member chhungkua 150 vel an awm mek a ni.

PYD conference

UPC (NEI) hnuaia Aizawl East District leh North Mizoram District huam chhunga pastor bial 62-ah nizan aṭang khan bial PYD conference ṭan a ni. Inkhawmpuiah hian vawiinah rorel a ni ang a, naktuk Pathianni zanah a ṭiak ang.

Puanṭhui zirna ṭan

Women Centre, Phunchawnga puanṭhui zirna, 2025 batch chu nimin khan hawn a ni. Women Centre hi Mizoram Presbyterian Kohhran Hmeichhe enkawl a ni a, 2025 batch-ah hian puanṭhui zir mi 50 an awm a, kumin chhung an zir dawn a ni. Centre-ah hian superintendent pakhat, zirtirtu pahnih leh thawktu dang pahnih an awm mek.