National Girl Child Day hman a ni

Nimin January 24 kha India ramah National Girl Child Day a ni a, Mizoram hmun hrang hrangah hman a niin, Beti Bachao Beti Padhao (BBBP) kum 10 tlin lawm nghal a ni. Aizawlah chuan Dawrpui Multipurpose Hall-ah hman a ni a, khuallian chief secretary Khili Ram Meena-a'n hmeichhe naupang 16 hnenah chawimawina a hlan.

Khili Ram Meena chuan, kum 2011 chhiarpui (census)-ah mipa leh hmeichhe naupiang inthlauhna chu 1,000/918 a nih thu a sawi a, "Mipa piang aia hmeichhe piang an tlem avangin hmeichhe naupangte an dam khawchhuah nan leh humhalh dan tur te, zirna ṭha pek dan turte ngaihtuaha hma la turin BBBP hi prime minister Narendra Modi chuan January 22, 2015 khan Panipat, Haryana-ah a hawng a ni," a ti.

Mizoramah chuan Siaha leh Serchhip district-ah child sex ratio (mipa leh hmeichhe inthlauhna) a hniam avangin BBBP chu pilot project anga kalpui hmasak a nih thu sawiin Chief Secretary chuan, "Tunah pawh hian Mizorama district 11 zingah Siaha leh Champhaite hi child sex ratio hniamna district a la ni," a ti a; child sex ration hniamna district pahnihte chu ngaih pawimawh a ṭul thu a sawi.

Inkhawm hi SWTAWCD secretary Lalzarmawii'n a kaihruai a; Women & Child Development ambassador Miss Mizoram 2024 Jennifer Lalrinzuali Renthlei kaihhruaiin kal khawmte'n BBBP thutiam an sawi rual. Sports & Youth Services leh Excise & Narcotics secretary Lalramsanga Sailo leh WCD director Zoramthangi Chhangte ten thu an sawi bawk.

National Girl Child Day hmannaah hian Health & Family Welfare, School Education, Home, Rural Development, LAD, LESDE, SYS, UDPA, District Council & Minority Affairs, Social Welfare & Tribal Affairs leh Women & Child Development department-te, bank leh Post Office hotu te, Dawrpui School of Science & Technology leh Centenary School zirlaite an tel. Hmeichhe naupang, kawng hrang hranga chhuanawm bikte hnenah chawimawina hlan a ni.