KHAWTHLIR

Thisen pe
Nazareth Institute of Management and Technology (NIMAT), Aizawl chuan nimin khan an institution hall-ah blood donation camp an huaihawt a, Aizawl Civil Hospital tan thisen unit 30 an pe a, a petute hmeichhia 21 leh mipa pakua an ni.

Consumer Awareness
Mamit District Con­sumer Organisation chuan nimin khan Mamit Chhimveng YMA Hall-ah Consumer Awarness Campaign an buatsaih a, Mamit additional DC Lalbiaksangi'n a hmanpui. Campaign-ah hian thil leitu (consumer)-te dikna leh chanvo chi hrang hrangte an inzirtir a ni.

V/C training
Sangau RD Block huam chhunga village council member-te tan nimin khan Sangau BDO conference hall-ah Rural Development department hnuaia thingtlang mite tihhmasawnna tur scheme hrang hrangte zirchianna buatsaih a ni a; V/C member ṭhahnem tak an tel.

MJA Library pe
MJA Public Library-a dah turin M Lalmanzuala'n a lehkhabu ziah, 'Zoram Kalsiam' tih copy hnih a pe a, Dr Vanlalfaka'n a lehkhabu buatsaih, 'Lenrual hlui' tih bu hnih a pe bawk. Lehkhabu petute chungah MJA chuan lawmthu a sawi a ni.

NLUP sem
Nimin khan Kolasib District Agriculture Office conference hall-ah NLUP hnuaia WRC-I (leilet) thlangtu chhung­kaw 76 hnenah third instalment sum sem a ni a, Rs. 30,000 ṭheuha pek a ni.

Ar notê thi nasa
AH&Vety department-in kar hmasaa Mamit district chhung khaw hrang hranga ár notê an semte chu an thi nasa hle niin an sawi. Thu dawn danin, Mamit district-ah hian NLUP-a ar vulh thlangtu mi pakhat hnenah ar notê 100 zel pek a ni a; Mamit khawpui chhunga mite'n ar notê an dawnte an thi nasa a, nimin lamah phei chuan 100 zingah 20 dam tling an awm meuh tawh lo a ni.