Kum 2005 hmaa siam pawisa June 30, 2015-ah a thi dawn

National newspaper hrang hranga tarlan danin, pawisa note, kum 2005 hma lama siamte chu June 30, 2015 aṭangin a thi dawn. Hei vang hian Reserve Bank of India (RBI) chuan kum 2005 hma lama siam pawisa note kawlte chuan an account-a thun (deposit) emaw, bank-a thleng turin a hriattir.

Kum 2005 hma lama siam pawisate hi January 1, 2015-ah tihthih tum a lo ni tawh a, mahse RBI chuan huntiam hi June 30, 2015 thleng a pawtsei a ni. RBI chuan, kum 2005 lama siam pawisate chu a him tâwk loh vanga tihtawp tum a nih thu an sawi.

Kum 2005 hma lama pawisaah hian a siam kum ziah lan a ni lo a, kum 2005 hnu lama siamteah erawh chuan a hnung lam hnuaiah a siam kum ziah lan vek a ni.