Legal Metrology-in kum 2014-15 chhungin Sorkarah Rs. 10,40,970 an chhûng lut

Legal Metrology department chuan sorkar kum liam ta, April 2014 - March 2015 chhung khan sorkarah Rs. 10,40,970 an chhûng lût. An target Rs. 10,00,000 chu Rs. 40,970-in an khûm.

Legal Metrology aṭanga thu dawn danin, kum 2014-15 chhung khan thil chi hrang hrang an endikna (inspection)-naa thil dik lo an hmuhchhuahte hnena sum an chawitir aṭangin Rs. 2,82,200 an hmu a; thil danga an sum hmuh nen belhkhawmin kum 2014-15 chhungin sorkarah Rs. 10,40,970 an chhûn luh thu, joint controller Thangtinliana Pachuau chuan zawhna chhangin a sawi.

Kum 2014-15 chhunga thil chi hrang hrang an endiknaa dik lo an hmuhchhuaha sum an chawitir tamna ber chu eirawngbawlna gas tihchingpennaah a ni a, LPG tihchingpen vanga sum an chawitirna aṭangin Rs. 1,56,500 an hmu.

Legal Metrology inspector-te chuan petrol pump-te ṭum 272 an endik a, sum chawitir an awm lo. Oil tanker 2,502 an endik a, tuialhthei lâk ṭhen leh a phái deuh tanker 13 an hmuh chhuaha pawisa chawitir zat chu Rs. 24,000 a ni. Khawnvartui zuar 128 an endiknaa dan loa thil ti an man aṭangin Rs. 25,000 an chawitir bawk.

Buhfai retailer-a bûk a tlin leh tlin loh ṭum 354 an endik a, bûkna dik lo hmang leh bûk tling lo 20 an man a, an sum chawi tlingkhawm chu Rs. 28,500 a ni.

Legal Metrology joint controller Thangtinliana Pachuau chuan, thawktu indaih tawk lo tih a sawi a, chuvang chuan an duh angin hna an thawk chak thei lo tih a sawi.