Khakchangpara-ah Bru lak let tur awm lo

Nimin June 22 kha Tripura-a Khakchangpara camp-a Mizoram Bru-te Mizorama lak let ṭan hun tur a ni a, mahse Mizorama kîr duh an awm loh avangin lâk let hna kalpui a ni lo.

Khakchangpara camp-a mite hi June 22-26, 2015 chhungin Mizoramah lak let tura ruahman a ni a, mahse kar kal ta lama an camp-a Mizoram mi an nih leh nih loh en­fiahna neihah inenfiahtir an awm loh avangin Mizorama lak let tur an awm lo a ni. Lak let tumna hmasa ber, Kaskau camp aṭangin Mizorama kîr duh an awm lo tawh bawk.

Hetih lai hian, sorkar ruahmanna awmsa angin camp danga mite chu enfiah leh lak let tum chhunzawm zel a ni dawn a; June 29 aṭanga July 2 thlengin Hamsapara camp-a Bru-te chu Mamit, Kolasib leh Lungleia SDC pathumte leh anmahni puitute'n an enfiah leh dawn a, Mizorama kîr duh an awm chuan July 6-10 chhunga lâk lêt an ni ang.