Hlawh - councillor Rs. 12,500; MLA Rs. 65,000

Aizawl Municipal Council (AMC)-a councillor-te chuan thla khat­ah Rs. 12,500 an hlawh a, hamṭhatna dang nen thla khata an dawn chu Rs. 21,060 a ni. Hetih lai hian, Mizoram MLA-te thla khat hlawh chu Rs. 65,000 a ni.

AMC hotute aṭanga thu dawn danin, AMC councillor-te hian thla khatah renumeration Rs. 6,000, sumptuary allowance Rs. 1,000, ward allowance Rs. 2,000, contingency allowance Rs. 1,000 leh transport allowance Rs. 2,500 an la a, a vaiin Rs. 12,500 a ni.

Heng bakah hian electric bill unit 400 chinah Rs. 1,560 an bill thei a, telephone bill landline-ah Rs. 500 leh mobile phone-ah Rs. 500 an bill thei a, unskill muster roll pakhat, ni 220 chhung thla khata Rs. 6,600 hlawhin an chhawr thei bawk. AMC councillor-te'n hamṭhatna an dawn leh an hlawh zawng zawng belhkhawm chu Rs. 21,660 a ni.

Thlabi hlawh bikah AMC councillor-te hian Mizoram MLA-te aiin thla khatah Rs. 52,500-in an hlawh tlem zawk a, MLA-te chuan thla khatah Rs. 65,000 an la. MLA-te hlawh tihpun hnuhnung ber chu August 1, 2011-ah a ni a, thla khat hlawh chu Rs. 24,500 aṭangin Rs. 65,000-ah tihsan a ni.

MLA Hostel-a awm lo, mahni ina awm MLA-te chuan thla khatah in luah man Rs. 5,000 an dawng a, sorkar thila an zinin Mizoram chhung­ah ni khatah dearness allowance Rs. 750 leh ram páwnah Rs. 1,000 an dawng. MLA-a an tlin vawi khatnaah an chenna in cheina atan Rs. 1,00,000 an hmang thei a, kum hnihna aṭangin kum tin kum nga chhung Rs. 5,000 an dawng bawk.

Mizoram MLA-te hian telephone bill-ah thla khatah Rs. 6,000 thleng an hmang thei a, electric bill-ah Rs. 5,000 leh tui bill-ah Rs. 2,500 an dawng. Grade IV pa­hnih an chhawr thei a, personal assistant pakhat, thla khata Rs. 10,000 hlawhin an chhawr thei a, sorkarin hlawh a peksak a ni.

MLA-te hian an chhungte nena an zin khawthawnna senso kum khatah sorkarin Rs. 2,00,000 thleng a tumsak thei a, an zin loh chuan pek tur a ni lo thung. Motor leina tur Rs. 650,000 pek vek an ni a, Assembly House-in sum a pek aia man to an lei chuan an pawisa an thawh belh a, sum pek aia tlawma motor an lei chuan pawisa an la kim lo nia thu dawn a ni. Driver pek tel an ni a, sorkar meeting-a an telin POL tumsak an ni.

MLA-te leh an chhungte'n damdawia inenkawlna senso (medical bill) an la thei a; MLA a thihin sorkarin Rs. 10,00,000-in a rál ṭhin. Pension hlawh chu

MLA-a ṭum khat tlingte tan thla khatah Rs. 20,000 a ni a, ṭum hnih MLA ni tawh tan Rs. 25,000 a ni. Pension hlawh hi MLA a thih­in a nupuiin a la thei a, a nupui a thih tawh chuan a fate kum 25 an tlin hma thleng an la thei bawk.