Van Dhan Scheme atan MoU ziak

24th January, 2020

Mizoram sorkara Cooperation department leh Ministry of Tribal Affairs hnuaia Tribal Cooperative Marketing Development Federation of India (TRIFED)-te chuan, Mizorama Van Dhan Scheme kalpuina turin nimin khan Cooperation minister C Lalrinsanga pisaah thawhhona thuthlung, Memorandum of Understanding (MoU) an ziak.

MoU-ah hian TRIFED aiawhin regional manager (Guwahati) AD Mishra-in hming a ziak a, Mizoram sorkar aiawhin Cooperation secretary JP Agarwal-in hming a ziak thung. Cooperation Minister chuan, thawhhona thuthlung ziah a ni chu thil chhinchhiah tlak a nih thu sawiin, "Thawhhona hi a taka kan tihhlawhtlin theih hunah chuan a hlâwkna tél tur leh ṭangkaipui ber tur chu thingtlang lama kut hnathawktute an ni," a ti a; Mizoram economy tan hmasawnna a thlen ngei a beisei thu a sawi.

MoU ziahnaah hian Environment, Forest and Climate Change department aiawhin Liandawla leh Cooperative department aiawhin registrar of cooperative societies Naveen Agarwal ten thu an sawi bawk. Van Dhan Scheme hi kut hnathawktute thiamna tihpun (skill upgradation) te, kawng hrang hranga an intuaihriamna zirtir (capacity building) te, tharchhuahte ṭha taka sawngbawl (primary processing) leh tharchhuahte man man zawka hralh theihna tura a hlutna tihpun (value addition)-te a ni.

Scheme hnuaiah hian self help group (SHG)-te chu primary level an ni a, a chung chiah village level-ah Kendra (Van Dhan Kendra) a awm. Mizoramah chuan Van Dhan Kendra atan primary cooperative society-te an ni dawn a, Kendra pakhatah SHG 15 awm tura beisei a ni. Mizoram pumah Van Dhan Scheme kalpui thei tur Van Dhan Kendra 43 ruahman a ni bawk. Van Dhan Scheme-in a ruahman angin, a thawh khatna atana primary level-ah SHG pakhat zelin Rs. 1,00,000 leh an hnathawhna tur sum che vel tur working capital Rs. 50,000 an dawng dawn a; a thawh hnihnaah Van Dhan Kendra (primary cooperative society) zinga a ti ṭha zual leh hlawhtlingte thlan chhuah a ni dawn a, chu'ngte chu Pucca Kendra-a hlan kai tur a ni. Pucca Kendra-te tih changtlun nan Rs. 20,00,000 ṭheuh pek a ni ang.