Mizoramah Republic Day lawm a ni

Nimin January 26 kha India danpui (Constitution) hman ṭanna ni, Republic Day a ni a, hmun hrang hrangah lawm a ni. Mizoramah pawh district khawpui tin leh hmun dang ṭhenkhatah lawm a ni a, Aizawlah chuan Governor Gen. Vijay Kumar Singh hoin Lammualah lawm a ni.

Lammuala Republic Day vawi 76-na lawmna hi zing dar 7:30-ah ṭan a ni a, Governor-in hnam puanzar pawt pharhin, parade contingent 23-te'n hnam puanzar chibai an bûk a chháng lêt a, thuchah a sawi.

Larsap Gen. VK Singh chuan, Mizo mipuite Republic Day chibai a bûk a, "He ni pawimawh takah hian kan hman tur danpui kan insiamsak a, hei hian dikna, zalenna leh intluktlanna min pe a ni. Danpui leh zalenna kan neih theih nana theihtawp chhuahtute kha he ni pawimawhah hian kan hre reng a ni," a ti.

India ram inpumkhatna leh inunauna tichaka vawng nung tura mipui sáwmin Gen. VK Singh chuan, "Mizoram hi chenna nuam, zahawm, ralmuang, hlawhtling leh hlimna hmuna siam i tum ṭheuh ang u," a ti a; R-Day lawmna a hlawhtlin theihna tura hma latu zawng zawngte fakawm a tih thu a sawi.

Governor chuan, mipuite chu ram ropui tak, sûlhnu ropui leh hma hun êng tak nei khua leh tui an ni tih inhre nawn tura chahin, "He ram hi kan zaa ta a ni. He ram inpumkhatna leh ropuina hi vawng nung zel ila, Mizoram hi mi tinte zahawm leh ralmuang taka an len zâna lo ni zel rawh se," a ti.

Larsap hian Mizoram sorkar hmalakna, hlawhtlinna leh hmachhawp chi hrang hrang a sawi a, "Ka sorkar chuan mahni kutkawiha eizawngtute leh kut hnathawktute puih nan leh state economy chawisan leh intodelh nan Bána Kaih (Handholding) Scheme chu September 2024 khan a tlangzarh," a ti a; Bana Kaih hmanga hmalakna chu Viksit Bharat @ 2047 (Developed India @ 2047) leh UN Sustainable Development Goals (SDGs) hlen chhuahna atana ṭangkai tak a nih thu a sawi.

Handholding scheme hnuaiah sorkarin a thawhpui bank leh financial institution-te aṭangin progress partner-te hnenah loan pek a nih dawn thu sawiin VK Singh chuan, "National Credit Guarantee Scheme ding lai angin state sorkar chu guarantor a ni ang... State Bank of India, Mizoram Rural Bank leh Mizoram Cooperative Apex Bank-te nen thawhhona thuthlung ziah tawh a ni," a ti.

Governor Gen. VK Singh chuan, Mizoram sorkar leh sorkar laipui hnuaia thawk zawng zawng inpeknaah lawmthu a sawi a, "Khawtlang aiawh leh kohhran leh tlawmngai pawl te, zirlaite leh chanchinbumite, Zoram mipui zawng zawng thian duh tak te u, hmasawnna thlen theihna tura in mi thawhpuina avangin ka lawm em em a ni," a ti.

Aizawla Republic Day lawmnaah hian chief minister Lalduhoma, Assembly speaker Lalbiakzama, minister-te leh MLA te, sorkar official-te leh zirlai eng emaw zat an tel a; Governor-in chawimawina leh lawmman chi hrang hrang a sem a ni.

GOVERNOR THUSAWI ṬHENKHAT

■ Mizoram hi state ralmuang tak kan la ni thei zel a, Mizoram police-te'n uluk taka an vil ṭhin avangin state chhung boruak muanawm tak kan nei. Nikum chhung khan kuhva tawlhrûk kg. 12,58,493 (Rs 16,69,60,900 hû) man a ni a, hemi kaihhnawihah mi 173 man an ni.

■ Ruihhlo hluar zel hi sorkarin a ngaimawh tak zet a, ruihhlo donaah theihtawp chhuah a ni. Police leh Excise & Narcotics-te hnathawh zarah nikum chhung khan mi 4,568 man niin, mi 4,619 chu case siamsak an ni. Chak zawkah ruihhlo kan do theih nan kohhran leh tlawmngai pawlte min thawhpui zel turin ka sawm.

■ Mizoram PWD chuan kum kal ta chhung khan km. 194.11-a thui kawng sial hna an thawk a, km. 264.35-a thui an blacktop a, km. 97.97-a thui high strength Cconcrete road an siam.

■ Sorkar sikul building 14 sak thar te, classroom 35 siam belhna te, sikul 43-a inthiarna sakte leh sikul building 18 sak ṭhat hna thawh mek a ni.

■ Thingtlanga zirtirtu indaih lohna phuhru turin kum kal ta chhung khan H/S zirtirtu 50 (regular) lak a ni a, casual teacher H/S-ah 350, M/S-ah 342 leh P/S-ah 460 lak a ni.

■ National Education Policy 2020-in a phût angin state university dinna tur hmalakna kalpui mek zel a ni a, Bill Drafting Committee for Establishment of State University in Mizoram chuan an zirchian sorkarah an thehlut tawh.

■ Mizoram mipui ban phâka hriselna enkawlna hmunhma hospital, health centre leh dispensary dah hi sorkar hian a ngai pawimawh em em.

■ Swachh Bharat (Urban) 2.0 hlawhtlinna kan hmu mek zel. Vawiin thlengin mimal inthiarna 16,917 leh vantlang inthiarna 1,037 sak tawh a ni. Mizorama khawpui 28-te chu open defecation free-ah puan a ni tawh a; Aizawl, Kolasib, Bairabi, Lunglei, Saitual, Lawngtlai, Siaha leh Thenzawl te ODF+ ah puan a ni tawh.

■ Pradhan Mantra Awaas Yojana-Gramin (PMAY-G) kaltlangin chenna in 25,361 sak zawh tawh niin, a dang 4,605 sak mek a ni.

■ Khaw 15-ah village knowledge centre din mek a ni. Inner line permit thawh hnihna (ILP Phase-II) pawh November 1, 2024 aṭang khan online veka kalpui a ni.

■ Tun hnai maiah Mizoram Electric Vehicle Policy, 2024 chu hman theih tura chhawp chhuah a ni.

■ Sorkar chuan ṭhalaite leh infiammite tana chhenfakawm a nih theina turin ṭan a la mek zel. October 2024 khan infiamna chi hrang hrang 15 aṭangin infiammi 410 hnenah Mizoram Sports Incentive Cash Award 2023-24 cheng nuai 110.64 hlan a ni.

■ Inhmun lo ram chin felfai taka ziah luhna online portal nikum November 5 khan hawn a ni a, Record of Rights-te pawh online hmanga mipui tlawhpawh mai theih a dah a ni tawh.

■ Hmunphiah chhêkkhawlna leh hralhna (warehouse-cum-collection centre), site office leh hmunphiah tihrona ni bawk chu Saipum, Vairengte, Marpara South, Tipperagahat, Pukzing leh Marpara-ahte sak zawh a ni tawh.