Vairengte-Sairang fûr hmaa zawh beisei; PWD-in an chan chin an blacktop dawn lo

Vairengte leh Sairang inkar kawng NH-06 chu NHIDCL chuan an chan chin chu kumin fûr hmaa siam zawh hman an inbeisei. Mizoram PWD pawhin an chan chin thawk mek mah se, blacktop an tum lo.

Vairengte-Sairang inkar kawng hi Mizoram BJP (MBJP) hruaitute chuan an president Vanlalhmuaka leh Core Group member Dr K Beichhua, MLA hoin January 25, Inrinni khan an tlawh a; NHIDCL hotute chuan, an chan chin chu ṭhál chhunga siam zawh hman an tum thu an lo hrilh a, "Ṭha taka kawng siam zo hman ngei turin theihtawp kan chhuah mek," an ti.

NHIDCL hotute sawi danin, Sairang-Khamrang inkar thawk tura an rawih contractor-in hna a thawh ṭhat loh avangin bàn a ni a, mi dang thawhtir a ni dawn. PWD-in a enkawl mekte chu Vairengte-Sairang inkar thlûr li na atana forest clearance a fel hma chu NHIDCL chuan lâk chi-ah an ngai lo a, forest clearance atan EFCC department-in an thawhpui ṭha duh lo a ni.

PWD pawhin an chan chin km. 40 vela thui chu ngawrh takin an siam mek a, hna thawktu 50 velin kawng khuar an hnawh mek. PWD engineer hotute chuan, kawng siamna atan cheng nuai 125 an neih thu BJP hruaitute hrilhin, "Hei hian blacktopping a daih dawn lo," an ti a, kawng khuar zual lai hnawh hna an thawh ber thu an sawi.

PWD engineer-te chuan, sorkarah pawisa dil belh mek a nih thu sawiin, "Engzat nge kan hmuh dawn hriat a ni lo. Pawisa kan hmuh dan azirin blacktop a thawh theih mai theih. Tuna kan sum neih sa aṭang hi chuan blacktop tihna tur a daih dawn lo. Lirthei tana tlan hrehawm lutuk zual hnawh hna kan thawk ang a, February 12, 2025 vela zawh hman tura beisei a ni," an ti.

BJP hruaitute chuan, Mizoram mipui châk lak luhna ber kawng chu sorkarin a ngaihsak tawk loa an hriat thu sawiin, "Kan tlawh lawk duh lo a, sorkar hmalakna kan ngaichang. Lirthei neitute'n tlan tlak loa an ngaih tak avangin tlawh loh theih a ni ta lo," an ti a; kawng chu tute enkawl pawh ni se, Mizoram kawng a nih avangin sorkarin a ngaihsak tur a nih thu an sawi.

PWD Minister emaw, minister dang emaw kaihhruaina hnuaiah monitoring committee din ngei ṭula an hriat thu sawiin BJP hruaitute chuan, "Kar tin report an thlirho ṭhin turah kan ngai. He kawng hi Mizoram tana kawng pawimawh tâwpkhâwk a ni a, sorkarin a ngaihthah thiang lo," an ti.