KHAWTHLIR

Thisen pe

BN College of Nursing chuan AVBD ngenna chhangin January 25, Inrinni khan Civil Hospital, Aizawl tan thisen unit 28 an pe a, petute hmeichhia 24 leh mipa pali an ni a; Network for Unity Association Mizoram (Myanmar aṭanga raltlante) pawhin AVBD thuchhuah an hmuh angin Civil Hospital Aizawl tan thisen unit 48 an pe. Inrinni vek khan Student Christian Movement of India, ATC unit chuan Synod Hospital tan thisen unit 32 an pe a, petute mipa 30 leh hmeichhia pahnih an ni. ṬKP, Theiriat Bial pawhin Lunglei Civil Hospital tan thisen unit 84 an pe a, petute mipa 67 leh hmeichhia 17 an ni.

RBD training

Aizawl Municipal Corporation chuan January 24, Zirtawpni khan an auditorium-ah AMC huam chhunga nau piang leh mitthi chhinchhiahtu, registrar of births & deaths (RBD)-te tan RBD Annual Training on Civil Registration System an buatsaih. AMC area huam chhungah hian damdawi-in behchhan RBD 24 leh veng (local) behchhan RBD 85 an awm mek a ni.

R-Day At Home

Republic Day lawmna kal zelah nimin chhun dar 12:30 khan Governor Gen VK Singh chuan Raj Bhavan Circular Lawn-ah At Home a buatsaih. He hunah hian chief minister Lalduhoma leh sorkar hotu lu dang te, sorkar officer liante leh sawm bikte an tel a, thingpui an inho a ni.

Thilpek hlan

Hnahthial bawrhsap Rita Lalnunmawii Pachuau chuan nimin khan Republic Day pualin Hnahthiala home pathum - Beth Rafa Boys Home, Gardenia Girls Home leh Jehova Jire Home bakah, District Hospital a tlawh a, thilpek (commemoration gift) a hlan.

Saphu káwr leh Meizial man

Assam Rifles chuan January 25, Inrinni khan Champhai Jail Vengah ram dang meizial báwmpui (case) 25 an man a, Rs 32,50,000 hu niin, Champhaia Customs hnenah an hlan. January 24, 2025 khan Zokhawtharah saphu káwr cheng nuai 24 hu vel an man bawk a, Champhaia Forest department hnenah an hlan bawk a ni.