National Voters' Day hman a ni

27th January, 2025

January 25, Inrinni kha National Voters Day a ni a, Mizoram hmun hrang hrangah hman niin, Aizawlah chuan Assembly Annexe conference hall-ah Governor Gen. Vijay Kumar Singh hoin hman a ni.

National Voters Day hmannaah hian vote nei thar mi ṭhenkhat hnenah voter identity card hlan a ni a; booth level officer (BLO) thawk ṭha thlante hnenah lawmman hlan a nih bakah, National Voters Day thutiam sawi rual a ni bawk.

Governor chuan, Election Commission of India chu India rama democracy tundin leh chhawm nun zel kawnga hma latu pawimawh, innghahna lungpui leh tha tichaktu a nih thu a sawi a, "A ṭul ang zelin a inher danglam ve zel a, inthlanna felfai, muanawm leh tute tan pawha khairual tak hmingṭha takin an buaipui ṭhin," a ti.

India chu khawvel puma democracy hlawhtling ber tia hriat hlawh a nih mek thu sawiin Larsap chuan, "India Danpui duh dan angin inthlanna felfai leh muanawm tak neih a ni ṭhin," a ti a; India ram - democracy hlawhtling leh ṭhang duang tak a ni chu buainain a chîm mek ṭhenawm ramte awh rawn a nih thu a sawi.

Gen. VK Singh chuan, Lok Sabha inthlanpui nikuma Mizorama hlawhtling tak buaipuitu CEO, DEO leh official zawng zawngte chhuanawm a tih rualin, inthlan buaipuitu zinga police pangate'n nunna hlu tak an chán chu pawi a tih thu a sawi a, "An inpekna a ropui. State sorkarin ralna sum cheng nuai 15 ṭheuh an chhungte hnena a hlan a ni," a ti.

Aizawla Voters Day hmannaah hian Aizawl district election officer Lalhriatpui, bawrhsapin inlawmna thu a sawi a, chief election commissioner Rajiv Kumar thuchah ngaihthlak a ni. RK Rinsanglura, St. Joseph HSS kaihhruaiin Voters Day puala thutiam sawi rual a ni.

January 25, 1950 khan ECI din a ni a, ECI din ni hi National Voters' Day atan hman a ni. Voter-te hnena inthlan kaihhnawih pawimawhte inzirtirna atan hman ṭhin a ni a, kumina thupui chu 'Vote thlak tluk a awm lo, vote thlak ngei ka tum e' tih a ni.

January 6, 2025-a Mizoram Electoral Roll 2025 tlangzarh taka a lan danin, Mizoramah voter 8,69,813 an awm a, mipa 4,20,888 leh hmeichhia 4,48,925 an ni.