Hmun hrang hrangah Republic Day lawm a ni
Nimin khan Mizoram hmun hrang hrangah Republic Day vawi 76-na lawm a ni a; district khawpuiahte chuan bawrhsapte khuallian niin, hnam puanzar an pawh pharh bakah thuchah an sawi. Sorkar hmun pawimawh ṭhenkhatahte lawm a ni bawk.
LUNGLEI
Lungleia Republic Day lawmna chu C Ṭhuamluaia Mualah neih a ni a, bawrhsap Navneet Mann-i'n zing dar 7:30-ah hnam puanzar a pawt pharh a, parade contingent 26-te chibai bûk a chhang. DC chuan, ram inpumkhatna leh ropuina vawng nung zel tur leh Lunglei district hmasawnna leh hamṭhatna atana thawk zel turin mipui a sawm.
Parade contingent 26-te chu armed contingent pali, unarmed contingent pakua, school contingent 10 leh pipe band pathum an ni a; unarmed contingent-ah Lunglei College NCC leh school contingent-ah 2nd Bn MAP English Medium School pakhatna an ni.
SIAHA
Siahaah chuan zing dar 7:30-ah SDFA Ground-ah R-Day lawm a ni a, bawrhsap VL Hruaizela Khiangte-in hnam puanzar pawt pharhin, parade contingent 20-te chibai bûk a chhang let. Bawrhsap chuan, ram leh hnam tan an theihna leh thiamnate hlan zel tur leh mi dang tan malsawmna nih tum ṭheuh turin district mipui a chah.
Siahaah hian parade contingent 20 zinga 14 chu school contingent an ni a, unarmed contingent pathum, armed contingent pahnih leh pipe band pakhat an ni. School contingent-ah Blue Bells School leh unarmed contingent-ah Don Bosco School NCC-te pakhatna an ni.
CHAMPHAI
Champhaiah chuan Chhangphut Field-ah R-Day lawm a ni a; bawrhsap VL Remliana'n hnam puanzar a pawt pharh. Bawrhsap chuan, faina, thianghlimna, Mizo hnam nun ze mawi chhawm nun kawngah leh intodelhna kawngah ṭan la thar turin district mipui a sawm.
Champhaia R-Day lawmnaah hian parade contingent 18 an awm a, unarmed contingent panga, armed contingent pakhat, school contingent 12 leh pipe band pakhat an ni. Unarmed contingent-ah GM High School Boys & Girls NCC leh school contingent-ah Eastern Flower Academy pakhatna an ni.
KOLASIB
Kolasib-ah chuan zing dar 7 khan DC pisa tualah R-Day lawm a ni a, bawrhsap Robert C Lalhmangaiha'n hnam puanzar a pawt pharh a; school contingent an awm lo a, Mualvuma 1st IR Battalion-te'n hnam puanzar chibai an bûk.
Bawrhsap chuan, "Kan ram danpuiin nghet taka a lo duan, dik taka rorelna, intluktlanna leh inunaunate hi lo vul nawn leh se tih hi duhthusam a ni," a ti.
SERCHHIP
Serchhip Sport Complex-ah R-Day lawm a ni a, bawrhsap Paul L Khuma'n hnam puanzar a pawh pharh. DC chuan, district mipuite chu an tih tur leh mawhphurhnate ṭha taka hlen zel turin a fuih.
Serchhipah hian parade contingent 13 awmin, unarmed contingent pali leh school contingent pakua an ni a; unarmed contingent-ah Serchhip College NCC Army Wing leh school contingent-ah Goodwill English Academy-te pakhatna an ni.
LAWNGTLAI
Lawngtlaiah chuan zing dar 7-ah Central YLA khelmualah R-Day lawm a ni a, bawrhsap Cheemala Siva Gopal Reddy-a'n hnam puanzar a pawt pharh. Bawrhsap chuan, India danpuiin dikna chanvo a pek ngaihlu tur leh khua leh tui ṭha ni tura theihtawp chhuah turin district mipui a sawm.
Lawngtlaia R-Day lawmnaah hian parade contingent 20 an tel a; armed contingent pakhat, unarmed contingent pasarih, school contingent 11 leh pipe band pakhat an ni. Unarmed contingent-ah Don Bosco School NCC leh school contingent-ah South Heath Academy School-te pakhatna an ni.
MAMIT
Mamit GSA Playground-ah Republic Day vawi 76-na lawm a ni a, bawrhsap K Laltlawmlova'n hnam puanzar a pawt pharh. K Laltlawmlova chuan, India ram ro inrelna kalphung leh a hlutnate humhim a, tichaktu ni turin kal khawmte a chah.
Mamitah hian parade contingent 14-te an awm a; school contingent pakua, armed contingent pakhat, unarmed contingent pathum leh Samarga pipe band pakhat an ni. School contingent-ah JNV Boys pakhatna an ni a, unarmed contingent-ah Mamit College Mizo Bn. NCC-te pakhatna an ni.
SAITUAL
Saituala Republic Day lawmna chu Keifang Centenary Sports Complex-ah neih a ni a, bawrhsap Dr Lalngura Tlau-in parade contingent 11-te'n hnam puanzar chibai an bûk a chhang lêt. DC chuan, "Kan ram tana sûlsutu hmasa te, zalenna min thlen a, danpui ṭha tak min siamsaktute hre rengin zahna chibai bûk ṭheuh ang u," a ti.
Saituala parade contingent 11-te chu school contingent pariat, unarmed contingent pahnih leh pipe band pakhat an ni a; school contongent-ah Saitual High School-II pakhatna an ni.
KHAWZAWL
R-Day hi Khawzawlah chuan zing dar 7-ah Mualvawm Playground-ah lawm a ni a, bawrhsap K Vanlal ṭhiana'n hnam puanzar a pawt pharhi. Bawrhsap chuan, "India danpuiin min zirtirnate hre reng chunga district hmingṭhatna leh hmingmawina atan mi tinin theihtawp chhuah ṭheuh ang u," a ti.
Khawzawlah hian parade contingent 14 an tel a, ti ṭha zualte hnenah Bawrhsapin lawmman a hlan. School contingent zingah Far East Experimental School pakhatna an ni.
HNAHTHIAL
Hnahthialah chuan Hnahthial District Football Association turf ground-ah R-Day lawm a ni a, bawrhsap Rita Lalnunmawii Pachuau-in hnam puanzar a pawt pharh a, parade contingent pakuate'n hnam puanzar chibai an bûkna a chhán lêt.
Hnahthiala R-Day lawmnaa parade contingent pakua zingah Southern H/S Girls chu pakhatna an ni.
GAUHATI HIGH COURT
Gauhati High Court Aizawl Bench pawhin nimin zing khan Gauhati High Court tualah R-Day an lawm a; judge Justice Nelson Sailo-in hnam puanzar a pawt parh a, 225 Battalion CRPF-te'n hnam puanzar chibai an bûk.
High Court-a R-Day lawmnaah hian Gauhati High Court judge justice Marli Vankung leh GHC Aizawl Bench registrar Dr HTC Lalrinchhana, Aizawl disrtict & session judge Helen Dawngliani, Aizawl District Court-a judge te, Law & Judicial department hotu te, advocate te, Mizoram Bar Association hruaitute leh sorkar advocate-te an tel a ni.