Scho' sum a la rawn thleng lo - MZP

MZP chuan thuchhuah siamin, scholarship thawh thumna (third instalment) sem tur sum sorkar laipui aṭangin a la rawn thlen loh thu an tarlang.

Ministry of Tribal Affairs-in Mizoram sorkar hnenah scholarship sum a la rawn pek loh avangin scholarship sem theih a la ni lo tih tarlangin MZP chuan, "Scholarship thawh thumna nghaktu zirlaite aṭangin zawhna kan dawng nasa hle," an ti chuvang chuan Mizoram Scholarship Board (MSB) hotute an zawhfiah thu an sawi.

MZP chuan, tribal scholarship second instalment sem zawh a nih hnuah utilisation certificate leh lehkha dangte sorkar laipuiah thehluh nghal ni mah se, vawiin thlengin central lamin pawisa an la rawn pek loh thu an tarlang a, "Pawisa dawn a nih veleh sem nghal a ni ang," tiin, dawhthei taka nghâk turin zirlaite an ngen.

MZP tarlan danin, post matric scholarship (2023-24) chu zirlai 31,685-in an dil a, zirlai 26,670 pek tawh a ni. La dawng lo zirlai 5,015 an awm a, chu'ng zinga 3,981 chu sum awm veleh pek nghal tur a ni.

Zirlai 1,034 erawh pending mek a ni a, zirlai 898 chu Aadhsar felfai lo leh chhan dang dang vangin hnâwl (reject) an ni thung.

Tun thlenga scholarship sem tawh chu cheng nuai 3,471.91 a ni a, chujta ṭanga 10% (nuai 345.84 ) chu Mizoram sorkarin a tum (state matching share) a ni.

Sorkar kum 2023-24 atana scholarship sem zawh la ni lo mah se, sorkar kum 2024-25 atana scholarship dilna kum 2024 khan National Scholarship Portal kaltlangin hawn a ni a, tunah chuan dilna hun a tàwp tawh a ni.