Bairabi to Sairang rel kawngah Compensation sum a kal tam

Bairabi to Sairang rel kawng tur siam mekah compensation atana sum hman a tam a, 8% vel sên a ni. North East Frontier Railways (NEFR) (construction) general manager RS Virdi chuan compensation atan sum sen belh a la ṭul mai thei niin a sawi.

RS Virdi hian nimina State Guest House-a thuthar thehdarhtute a kawmnaah Vanglaini zawhna chhangin, "State sorkar chu a âwm tawka compensation pek a nih theihna atan hma la turin kan duh ṭhin. Tlem lutuk pek chu ṭha kan ti bik loa, a san lutuk erawh chuan a buaithlak ṭhin," a ti.

NEFR General Manager sawi danin, Mani­pur-ah chuan compensation-ah hian pro­ject pumpui atana sum hman tur aṭanga 3% a kal laiin, Mizoramah chuan 8% sen a ni.

Bairabi-Sairang rel kawng siamna atan ram lakah compensation tihfel thawkhat a ni tawh tih sawiin, "Mi ṭhenkhatin compensation pek belh phutin Court-ah an kal a, kan inkhing dawn a ni. Court thurel dan azirin compensation atan hian kan insen belh a ṭul mai thei," a ti.

Bairabi-Sairang rel kawng hi km. 51.48-a thui tur a ni a, a senso tura ruahman chu cheng vbc. 2384.34 a ni a, March 2018 a zawh tura tih a ni. Rel kawng tur atan hian lei 183 (km 7) dawh a nih dawn bakah, lei hmun 23 ah km 9.92-a thui verh a ni dawn. Station pali Hortoki, Kawnpui, Mualkhang leh Sairangah a awm ang.

NEFR General Manager chuan Sairang aṭanga Mizoram chhim tawp lam Hmangbuchhuah thleng rel kawng siam turin survey neih mek a nih thu sawiin, "Survey report hi August, 2015-ah an peihfel beisei a ni. Survey report a awm hnu chuan a ṭul anga bawhzui a ni ang," a ti.

RS Virdi sawi danin, Bairabi - Lumding rel kawng tihzauh hna pawh ngawrh taka thawh mek a ni a, March 2016-a zawh hman tura beisei a ni.