Special category state titawp lo turin Zorama'n Modi ngen

MNF chuan thu­chhuah siamin, MNF president Zoramthanga'n prime minister Narendra Modi hnenah lehkha a thawn a, special category state titawp lo turin a ngen niin an tarlang.

MNF tarlan danin, Zoram­thanga chuan a lehkhathawnah chuan, sorkar laipuiin special category state tihtawp chung­chang a ngaihtuah mek tih a hriat thu a ziak a, "Indian Union-a state dang zawngte aiin a bika dâwmkân ngai, heng special category state-te economy dinhmun hi a hnufual bik hle. Economy-a an hnufualna chuan sum leh pai bakah ram inrêlbâwlnaah te, politics-ahte harsatna tam tak siamin, buaina nasa tak chhuak thut thei a nih bakah, helnate a chhuah ṭhin chhan pawh heng vang hi a ni ṭhin," a ti.

MNF President chuan sorkar laipui leh MNF-in ‘Mizoram Peace Accord of 1986’ a ziah thu tarlangin, "Central sorkar leh MNF inremna hi inremna zawng zawnga hlawhtling ber a ni. He inremnaah hian Mizoram chu special category state a nih angin sum leh paiah Central puihna pek tur a ni tih chiang takin a chuang a ni," a ti.

Zoramthanga tarlan danin, sorkar laipui leh MNF inremnaah, 'Sum indaih lohna kal zel (residuary gap) ngaihtuah chung leh plan outlay tikal mar reng thei turin Central sorkar aṭanga plan sum hmuh tur chu bithliah tura tih a ni a; a bithliah dan tur pawh 'special category state’ anga tih tur a ni ang' tiin a inziak a ni.

Peace Accord-ah sorkar laipuiin thu a lo tiam tawh chu tihtawp a thiang lo tluka ngaih a nih thu tarlangin MNF President chuan, "Kha Accord kha tihtawp mai a nih chuan nakin zela sorkar laipuiin ram chhung leh páwn lama intiamna a siam reng reng kan hmuh dan a dik tawh lo ang a, India sorkar tih atan pawha thil mawi lo tak a ni zui ngei ang," a ti a; Mizoram chu special category state a nihna tihtawpsak lo turin a ngen a ni.