KHAWTHLIR

Ni 3 awh session
Assembly speaker Hiphei hoa nimina Assembly Business Advisory Committee ṭhukhawm chuan, Mizoram Legislative Assembly session, July 7, 2015-a ṭan tur chu ni thum chhung neih turin an ruahman. Session-ah hian Finance minister Lalsawta'n sorkar kum kal mek 2015-16 atana budget ruahman leh Vote on Account a pharh ang.

MJS kaisang
Gauhati High Court chuan judge pahnih - Lucy Lalrinthari leh KL Liana te chu selection grade-ah a kaisantir. Lucy Lalrinthari hi District & Sessions Judge a ni dawn a; KL Liana chu tuna a hna chelh lai, Motor Accident Claims Tribunal-a presiding officer hna bakah, ND&PS Act-ah Special Judge hna pek belh a ni.

Chawngte YMA-in êng tha an phût
Chawngte Joint YMA chuan thuchhuah siamin, Chawngte leh a chhehvel khuaah kawlphetha ṭha zawka pe turin thuneitute an ngen a, ngaihthah an nih reng chuan an theih dan ang anga hmalak an tum thu an tarlang. Tunlaiin Chawngte leh a chhehvel khuate a lum em em a, temperature pawh celcius degree 37-38 te a nih ṭhin avangin kawlphetha ṭha mamawhna a sang hle tih an sawi.

Ph.D hmu thar
Judy Lalengvari d/o Lalrosanga, Hermon Childrens Home chuan Dr Bhimrao Ambedkar University, Agra aṭangin Hindi literature-ah doctor of philosophy a hmu thar a, a thesis chu 'Idealogy in the poetry of Dinkar' tih a ni.

Lawngleng thar
Mizoram Police-te chuan Tlawng luia mihring tla leh motor tlate leh chhiatna danga chhanchhuah hna thawhna turin khawl hmang chi lawngleng an nei thar a, Sairang Police Station-ah an dah.

Lusûn khawhar
Neil Zozamliana (46), IPRO s/o Dr C Silvera chu June 22, 2015 tlai dar 4:15 khan cancer avangin a thi a, nimin khan Tuikhuahtlanga an inah vui a ni.