Kelkangah ek-in 200 siam mek

NLUP sum bank-a daha a pung (interest) hmangin Kelkang khaw tan sorkarin ek-in 200 a siam mek thu sorkar thuchhuah chuan a tarlang.

Thuchhuah chuan, "June 2013 aṭanga vawiin thlengin Kelkang khuaa harhna thleng chhim tura kal mi eng emaw zat an la awm reng a, Kelkang chhungkaw tlemtê awmna khuaa ek-inte chu a khatin, inthiarna mumal nei lo an awm tawh avangin Mizoram sorkar chuan NLUP sum bank a dah pun hmangin hma a la mek zel a ni," a ti.

Tui harsatna sutkian nan NLUP-a thawktute'n Kelkang aṭanga km. 1½ a hla, Dilkawna mi tui châwi theih nan JCB (excavator) hmangin kawng an lai ṭan tawh tih a tarlang bawk.

Tun hnaia Home Minister-in Kelkang a tlawh ṭuma mipui hriselna atan ek-in khat tawh paihfai hna thawh ni se a tih chu Aizawl Municipal Council hotute'n ngai pawimawhin Kelkangah cess pool (ek paihna) khawl pathum an thawn a, thenfai hna thawh a ni.

Champhai DC H Lal­eng­mawia chuan, Kelkanga êk-in sa tura hnatlang thei tur mi tlawm­ngai an mamawh thu a sawi a; chumi bawhzui chuan Thawhṭanni leh vawiin khan Champhai Zotlang Prebyterian Kohhran leh Champhai Venglai Presbyterian Kohhran aṭangin mi ṭhahnem tak an thawk chhuak.