Union Textile minister Gangwar hnenah Rohluna'n Mizoram mamawh thlen

Industries minister H Rohluna chuan, June 22, 2015 khan New Delhi-ah Union Textile minister Santosh Kumar Gangwar a hmu a, Mizoram mamawhte a thlen.

H Rohluna chuan Union Textile Minister chu Mizorama handloom tihhmasawnna tur kawng hrang hrang a sawipui. Tna hmalakna kal mek, Weaver’s Service Centre hawng tura sàwmna chhang­in, Santosh Kumar Gang­war chuan, July 3-ah Aizawla rawn kala hawn a remtih thu a lo hrilh. Industrial Growth Centre, Luangmuala Incubation Centre for Apparel Manufacturing, cheng vbc. 20 senga dinna tur lungphûm pawh phûm a remtih thu a sawi bawk.

Weaver’s Service Centre hi Chaltlanga ZOHANCO building-ah bul ṭan phawt a ni dawn a, Guwahati aṭangin khawl chah a ni ang. Training chi hrang hrang pekna tur a ni. Incubation Centre dinna senso chu sorkar laipuiin a tum vek dawn a, Mizoram sorkarin ram an mamawh ang acre 1.5 a pe a, NBCC-in an thawk ṭan tawh a ni.

Industries Minister hian Thenzawla Handloom Project, cheng nuai 800 hu din tum chungchang pawh Union Minister hnenah a thlen a; he project hi remchang hmasaah Chief Minister-in a hawng ang.

School Education minister ni bawk H Rohluna hian Ministry of Human resource Development hnuaia Teachers Education director Anamika Singh a hmu bawk a; Mizorama DIET pariata thawkte hlawh tur an pek mai loh vanga harsatna awm chingfel turin a ngen.

Sorkar thuchhuah tarlan danin, H Rohluna ngen angin, Teachers Education director chuan Mizoram DIET sum tur chu an chingfel nghal a, kum 2014-15 atan cheng nuai 820.09 pein, sanction order pawh minister Rohluna kutah a hlan nghal a ni.