Thla 6 hlawh la lo DIET hnathawkte tan Central-in hlawh tur cheng nuai 820 pe

Mizoram puma District Insti­tute of Education and Training (DIET)-a thawkte chuan thla ruk chhung hlawh an la tawh lo. Nimin khan Central-in sum pekna (sanction order) a tichhuak a, tun kar chhungin hlawh an lâk theih a beiseiawm.

DIET-a thawkte hnen aṭanga thu dawn danin, DIET-a thawkte zawng zawng hi centrally sponsored scheme (CSS) hnuaia awm vek an ni a, Aizawl DIET leh Lunglei DIET-a principal-te bik erawh chu state plan hnuaiah an awm. DIET sum hman turte chu Central-in a rawn pek a ni.

Kum 2014-15 chhunga Mizoram DIET sum hmuh tur chu Central-in a pek chhuah tlai vangin hlawh an la thei lo a, December 2014 aṭanga kumin May thla hlawh an la thei rih lo niin an sawi. DIET hotute chuan Mizoram sorkarah Plan hnuaia dah an dil ṭhin a, mahse tun thlengin sorkarin CSS hnuaia awm turin a la ti rih niin an sawi bawk.

Hetih lai hian, State Council of Educational Research and Training (SCERT) director Malsawmthangi chuan Vanglaini palai zawhna chhangin, Central-in nimin khan Mizoram DIET sum tur cheng nuai 820 a rawn pek thu a sawi.

Malsawmthangi chuan, nimina Central aṭanga sanction order an hmuh chu kum 2014-15 atana recurring second instalment a nih thu a sawi a, "Sum a rawn thlen tawh avang hian tun kar chhungin DIET-a thawkte hi hlawh pek theih kan beisei," a ti.

SCERT Director sawi danin, kum 2014-15 atana Mizoram DIET sum first instalment cheng nuai 820 chu March 2015-ah hmuh a ni a, second instalment pawh niminah hmuh niin, second instalment sum hmang hian December 2014 - March 2015 chhunga hlawh pek a ni ang.

Lunglei leh Aizawlah DIET puitling a awm ṭhin a, district headquarters dang paruka District Resource Centre (Mini DIET)-te chu DIET puitlingah hlankai a ni a, mahse a tak takin DIET puitling angin a la kal thei rih lo. DIET-ah hian sanction post 222 awmah mi 200 vel an thawk mek a, a ngheta thawk leh nghet loa thawkte pawh CSS hnuaiah an awm vek a ni.

Malsawmthangi chuan, kum dangah chuan DIET sum tur chu a kum chhunga June thla velah first instalment an hmu ṭhin a, kum 2014-15 bikah erawh chuan Central lamin an tikhawmuang tlat niin a sawi.

SECRT Director chuan, kum 2015-16 chhunga DIET sum hman tur (detailed project) chu Central-ah an thehlut tawh a, School Education minister leh parliamentary secretary-te pawhin Delhi-ah an bawhzui tawh tih a sawi a, "Internal Finance Division-ah a awm mek a, secretary thar an dahin hna a la zawm loh vangin a muangchang leh ta deuh ni," a ti.

SCERT-in Mizoram puma DIET tana kum 2015-16 atana Central-a sum a dil zat chu cheng nuai 5136.25 a ni a, chung zinga nuai 513.62 chu Mizoram sorkar tum tur (matching share) a ni. DIET sum hi Central-in a vaiin a tum ṭhin a, kum 2012-3 aṭangin Central-in 90% tumin, state sorkarin 10% a tum ve tawh a ni.