Project tángte bawhzui dan tur sawiho

Mizoram sorkara Special Project Monitoring Committee (SPMC) chu an chairman, Zodintluanga, UD&PA minister hoin Secretariat Conference Hall-ah an ṭhukhawm. Meeting hian Mizoram hmasawnna tur project tangkhangte chak zawka bawhzui dan tur an rel.

Meeting-ah hian Non Lapsable Central Pool of Resources (NLCPR) leh North Eastern Council (NEC)-a DPR pawm tawh, hna thawhna tura sum la pek chhuah loha táng mekte dinhmun an thlir. Kum sarih, 2006-07, 2008-09, 2009-10, 2010-11, 2012-13, 2013-14 leh 2014-15 chhunga project thehluh pawm tawh, sum la pek chhuah loh NLCPR-ah project 65 leh NEC-ah project 10 a awm mek a ni.

Meeting chuan, hna thawhna tur sum sanction tlai a nih chhante a theih ang anga chhui chiang turin a kaihnnawih department-te an hriattir a; chutih rualin, project táng mek zinga a tam zawk chu sorkar laipuia bawhzui ngai a ni. Project ṭhenkhat chu thawh tlak loh leh thawh theih tawh loha ngaih a nih avangin tihtawp an rél bawk.

Project táng mekte bawhzui turin Special Project Monitoring Committee chairman Zodintluanga leh member secretary Dr C Vanlalramsanga, planning secretary-te chuan vawiin hian New Delhi an pan dawn a ni.