Vety-in ár note thih chhan an sawifiah

AH&Vety department chuan thu­chhuah siamin, Mamit district-a NLUP hnuaia ar note sem thi chungchang a sawifiah a; ar note sem tawh thih chhan chu khaw awm danin a zir loh vang nia a lan thu a tarlang.

Vety Director tarlan danin, Mamit district-ah hian NLUP second phase hnuaiah ar vulh thlangtu chhungkua 356 an awm a, supplier kaltlangin ar notê 50 ṭheuh pek tawh niin, 100 ṭheuh la dawng leh tur an ni. June 16, 2015-ah Lengpui leh Phuldungsei inkara khaw 15-ah ar notê 9,600 sem a ni a, June 18, 2015-ah Reiek aṭanga Mamit inkar tlangdung khaw 21-ah ar notê 9,100 sem leh a ni.

An note sem ni hmasa zawk, June 17-ah chuan khaw awm danin a zir a, boruak ṭha tak hnuaiah sem niin, a dawngtute aṭangin sawiselna a awm zui lo. Sem vawi hnihna, June 18-ah erawh nasa takin ruah a sûr a, ar notê semte an thi nual tih thu an dawng thung.

AH&Vety department chuan, ar notête chu Vety department official leh supplier-in an sem a, a thi leh a chau zualte chu semna hmunah hrisel ṭhain thlakthleng zel a nih thu an tarlang a, "A dawngtute hnen a thlen tawh hnuah eng emaw zat a thi tih hriat a ni. Hetianga mi ṭhenkhatte'n vanduaina an tawh chhan hi hri leh thil dang vang ni loin, khaw awm danin a zir loh vang (unfavourable weather condition) niin a lang a, chhui chiang turin hmalak mek a ni," an ti.