Zarkawtah vantlang inthiarna hawng

Zarkawta vantlang inthiarna, (communi­ty toilet) siam thar chu nimin zing khan AMC-a bialtu councillor Rosiamngheta'n a hawng. Inthiarna siam nan hian Rs. 35,70,000 hman a ni.

AMC executive councillor Rosiamngheta chuan, Aizawl khawpui enkawl kawngah neitu thinlung pu chunga hna thawh a ṭul thu sawiin, "Aizawl veng hrang hranga vantlang inthiarna enkawltu awm lo tih hriat taka ṭawp tak tak hmuh tur awm ṭhin hi mipuite rilruah neitu thinlung a awm loh vang a ni," a ti a; Zarkawta vantlang inthiarna hawn thar chu a hmangtute'n thianghlim taka an hmana an enkawl a ṭul thu a sawi.

Vantlang inthiarna hi North Eastern Region Capital Cities Development Investment Programme hnuaiah SIPMIU-in an siam a ni a, hmeichhia leh mipa hman tur a hranga siam niin, tunlai hmanraw changkang zawka siam a ni. Inthiarna hi hman man a awm dawn a, Zarkawt Local Council-in an enkawl ang.

SIPMIU chuan Aizawl khawpui chhung hmun 10-ah vantlang inthiarna an siam dawn a; Bawngkawn bazar, Bethlehem Vengthlang, College Veng, Mission Veng, Ngaizel leh Ch.Chhunga Bus Terminal-a mite chu siam zawh tawh niin, hmun pathumah siam mek a awm.