MJA-te'n sorkar hnathawhte an tlawh
Mizoram Journalists' Association (MJA) General Headquarters hruaitute leh Mamita journalist-te chuan nimin khan Mamit district-a hmasawnna hnathawh hrang hrang an tlawh.
MJA hruaitute hian nimin zing khan Mamit District Hospital an tlawh a, damdawi-in hotute chuan thawktu indaih lohna leh an mamawhte an lo hrilh. Thawktute sawi danin, hnimhlum lam thiam doctor an nei lo a, staff nurse 14 chiah an neih avangin an indaih lo. Mamit district-a Kawrtethawveng damdawi-in (primary health centre)-ah ward superintendent leh staff pakhat chauh an awm a, Marpara PHC-ah staff nurse pahnih chauh leh West Phaileng PHC-ah staff nurse pathum chauh an awm. MJA hruaitute hian hospital poor fund atan sum an pe nghal a ni.
MJA hruaitute chuan Mamit DC Dr Lalrozama an kâwm a, Bawrhsap chuan, Mamit district chu Aspiration District a nih angin hmalakna chi hrang hrangte a lo hrilh. Dr Lalrozama chuan, NITI Aayog aṭangin kum 2018 khan zirna lama an hmalakna avangin lawmman pakhatna cheng nuai 300 an dawn thu sawiin, an lawmman dawn chu hmeichhia ziak leh chhiar thiamtirna atan te, zirlaite thiamna tak tak neihtirna atan leh, nau piang hlim thi tihtlemna atante hman a nih tur thu a sawi. Nikum khan lawmman pahnihna dawngin, cheng nuai 200 an dawn leh thu a sawi bawk.
MJA hruaitute chuan 132 kV line siamna hmun tur an tlawh a, Power & Electricity executive engineer Thanglura Sailo-in a lo dawngsawng. He power sub-station hi cheng nuai 4,945 chuang sênga siam tur a ni a, March 2021-ah siam zawh tur a ni. MJA hruaitute hian Nalzawla oil palm chìnna hmun an tlawh bawk.