Union Minister-in Khuangchera thlan a tlawh

Union of minister of state for Railways Rajen Gogain chuan, nimin khan Ailawnga pasalṭha Khuangchera thlân a tlawh a, zahna chibai bûkin, pangpar a dah.

BJP Mizoram Pradesh bultuma Ailawnga Khuangchera chawimawina inkhawm buatsaih tum, zirlai pawlte dodalna avangin ṭhulh ni mah se, Rajen Gogain hian Mizote pasalṭha huaisen thlân hmuh ngei a duh avangin nimin khan Khuangchera thlân hi a tlawh. Rajen Gogain hian Khuangchera thlân a tlawh zawhah Lengpui Airport aṭangin Mizoram a chhuahsan.

Union Minister hian Ningani tlai khan Governor Lt.Gen. Nirbhay Sharma chu Raj Bhavan-ah a kâwm a, Mizorama rél kawng siam mek chungchang an sawi dun.

Larsap chuan, Mizoram tan rél kawng a pawimawh zual bik thu leh tuna Bairabi leh Sairang inkara relkawng siam mek chu siam zawh hmanhmawh a ṭul thu Union Minister a hrilh.

Rajen Gohain chuan, sorkar laipuiin Mizoram chhunga rêl kawng siam mek uluk taka a vil thu a sawi a; Mizorama rêl kawng siam enkawltu, Railways hotu chu an hmalaknate chak taka kalpui turin a hriattir nghal a ni.