KHAWTHLIR

Thisen pe

Dawrpui Taxi Stand Welfare chuan, an din champha lawm nan nimin khan Aizawl Civil Hospital-ah thisen unit 23 an pe.

Sadbhavana Diwas

Prime minister hlui Rajiv Gandhi pian champha puala kum tina hman ṭhin, Sadbhavana Diwas chu nimin khan Mizoramah hman a ni. Sadbhavana Diwas hi August 20 a ni a, kumin-ah sorkar chawlh ni a nih avangin Mizorama sorkar pisa hrang hranga thawkte chuan nimin khan remna leh muanna vawnghimtu ni turin thu an tiam a ni.

Councillor pali New Delhi-ah

August 17-21, 2016 chhung awh tur, Waste and Sanitech Conference leh urban housing chungchangah Delhi-ah inkhawmpui neih mek a ni a; Aizawl aṭangin
Aizawl Municipal Corporation-a councillor pali - Lal-tlanzova Khiangte, H Zonunsanga, Zonunsangi leh Zodingpuii te an tel.

Mumbai pan

Mizoram Women Commission chairperson Vanlalawmpuii Chawngthu, MLA chu Mumbai-a Indian Youth Congress (IYC) National Executive Meeting-ah a tel dawn a, nimin khan Aizawl chhuahsanin Mumbai a pan.

Election training

Aizawl Municipal Corporation chhunga veng pathum - Chite Veng, Chhinga Veng leh Mission Venga local council bye-election neih tur buaipuitu turte tan nimin khan IPR Auditorium-ah training buatsaih a ni a; inthlan tura mawhphurhna neite an tel ṭha hle.

SA inkhawmpui

Salvation Army, India Eastern Territory chuan kum 2017-ah kum 100 tlin an lawm dawn a; chumi atana inbuatsaih nan Central South Division chhunga Eastern area-te tan nimin aṭang khan Khawzawl Dinthar Corps-ah inkhawmpui neih a ni a, August 21-ah a ṭiak ang.