Central-a sorkar tur leh thawhpui atan Congress aiin BJP kan duh - Zorama

MNF president Zoramthanga chuan, sorkar laipuia sorkar siam tur leh thawhpui atan Congress party aiin BJP kaihhruai an duh zawk thu a sawi.

Zoramthanga hian nimina Republic Veng community hall-a mi lawm luhna inkhawm-ah thu sawiin, "Central-ah Congress party aiin BJP kaihhruai sorkar se kan duh zawk a. Congress do tur leh hnâwl a ṭulzia hriaa pawl ding thar North East Democratic Alliance (NEDA)-ah kan tel a; NEDA hi party dangin an er em em a, khel tham pawh a ni. He thawhhona hi sakhaw lam khawih lo, political alliance a ni," a ti.

Zu zawrh chungchangah Zoramthanga chuan, Congress-in zu an zawrh mek hi an duh lohzia lantir nawn turin MNF-in kawngzawh an huaihawt dawn tih sawiin, "MNF mai ni lo, mipui zawng zawng telna tur kawngzawh hmanga titawp turin kan nawr dawn. Zu vangin Congress sorkar hi phoro an ngai a, corruption ni loin, zu in mite thin (liver) an pho ro a, veng tin khaw tinah an thi zawih zawih a ni," a ti a; nunna pakhat chhan chhuak tura sum sen a ngaih tamzia ngaih-tuahin, zu aṭanga chhiah vbc. 80 vel hmuh chu intihtheihna chi a ni lo tih a sawi.

Mizo pasalṭha Khuangchera chawimawi tum chungchangah Zoramthanga chuan, "India freedom fighter anga chawimawi tum hi a dik thei lo hul hual. Khuangchera khan India a hre lo a, a phuahchawp thil tih lutuk a ni," a ti.

MNF thuchhuah chuan, nimina lawm luhna inkhawmah hian an party zawm thar ZNP aṭangin 42, Congress aṭangin 18, MPC aṭangin panga leh neutral 52 an lawm lut niin a tarlang.