Naupangte kaihhnawih dàn zirho

Aizawl District Child Protection Unit (DCPU) chuan, nimin khan Aizawl Police Station conference hall-ah naupang kaihhnawih chungchang dan zirhona hun an buatsaih a; Aizawl PS, Kulikawn PS leh Women Cell aṭangin police officer 30 vel an tel.

Training-ah hian dan kalha che naupangte chunga thil tih dan tur leh naupang dikna chanvo humhalh chungchang an zirho a; Juvenile Justice (Care & Protection of Children) Act 2015 leh Protection of children from Sexual Offences (POCSO) Act 2012 an inzirtir a ni.

Training-a an tarlan danin, POCSO Act 2012 naupangte hur sualna lam kawng leh khawih chhiat venna dan a ni a, a hremna chu kum 3 aṭanga dam chhung tàn theih a ni.

He dan hian naupang khawih chhiat tuartute chanchinbu, TV leh social media-a an nihna hriat chhuah theih tura puanzar a khap bawk.