Lawngtlai Addl. DC leh SDO(S) pisa kai tur dan tum thawk chhuak

Central Young Lai Association (CYLA) chuan Mizoram sorkarin Lawng-tlaia Remna Ni hmanna tur sum a pek Rs. 3,00,000 pe chhuak kim duh loa Rs. 79,300 chauh pek chhuah a nih vanga an lungawi lohna kal zelah, nimin khan Lawngtlaia additional DC leh SDO (Sadar) pisa kâi tur an dang.

Additional DC leh SDO pisa kai tur dang tur hian YLA Central Executive Committee chin leh Lawngtlai town branch executive committee chinte DC pisa kawtah an pungkhawm. Hetihlai hian Addl. DC R Lalsangluaia leh SDO(S) Lallawmawma te hian chawlh an la a, Addl. DC chu Aizawlah a zin a, SDO(S) chuan pisa a kai lo thung.

SDO(S) hian a chennaah file a khawih tho tih an hriat avangin DC hriattir nghal a ni a, DC office staff-te leh CYLA hruaitute'n file an lak hnuah, officer pahnih dang tura thawk chhuakte chu an ṭîn darh a ni.

CYLA chuan, Lawngtlai Addl. DC leh SDO(S)-te chu Lawngtlai aṭanga sawn chhuah an nih theih nan leh an chawlh lak a zawh hun pawha pisa an kai theih loh nan dan chhunzawm zel an tum.

Remna Ni hmang tur hian Mizoram sorkar chuan CYLA hnenah mawhphurhna a pe a, CYLA chuan Lawngtlai khawpuia YLA branch hrang hrangte chanvo leh mawhphurhna a pe a; YLA-te chu an inbuatsaih vek tawh mah se, sum an dawn tur ang an ngaih an hmuh tâk loh avangin Remna Ni hi an lawm ta lo a ni.