Hunthar Vengah lei a khîk belh zel In 6 ṭhiat; chhungkaw 20 an chhuak tawh

Hunthar Veng, Aizawla lei tlak hniam ṭhinna chhaka August 13, 2016-a lei khì chu August 19, 2016 zan khan a khîk belh leh a, a tuk August 20 khan chhungkaw 20-in an chenna in an chhuahsan tawh a, nimin khan khawtlangin in paruk an ṭhiat. Lei khi huam chhungah hian chhungkua 50 vel an chêng a ni.

Hunthar Veng branch YMA president Rohmingthanga hnen aṭanga thu dawn danin, lei tlakhniamna báwr vela tuitái pût ṭhin leh luikawra tui luang ṭhin chu tun hnai khan a kang deuh vek a, hei vang hian khawi laiah emaw a relh rûa hriat a ni. Tui relh ru chuan lei chhûngril lamah hreuhin lei a tihnip a, lei khî a siam ta niin an ring.

Lei a khîk belh zel avangin chhungkaw 12-te chuan an in an luah zui ngam loin, Inrinni khan an in an chhuahsan a, Hunthar Veng khawtlangin an bungruate an thiar chhuahpui. In chhuahsantute chu - Biak-mawia, H Lalbiakthanga, Tlang-hmingthanga, Lalkaia, Lalrin-awmi, C Lalrinpuii, Sangkima, Vanthawmliana, Lalengmawii, Bawichhuakliana, Lalthangpuii leh Lungkhama an ni.

Chhungkaw 12 zinga pathum chu Legal Metrology department building ruakah an invawm lut a, chhungkaw ṭhenkhat chu mimal in ruak remchangah lutin, veng danga chhungkhat laináte pante pawh an awm. In luah tur leh pan tur remchang hmuh mai loh vanga la inthiar chhuak thei lo chhungkaw eng emaw zat an awm bawk.

Nimin khan in paruk ṭhiah a ni a; chu'ng in neitute chu - C Lalrinpuii, Lalbiakmawia, H Lalbiakthanga, F Lalkhara, Lalrinfela leh Lalthangpuii te an ni. Nimina in ṭhiah takah hian chhungkaw 14 an cheng a, chu'ngte leh Inrinnia in chhuah-santute nen chhungkaw 20 velin an chenna in an chhuahsan tawh tih, Rohmingthanga chuan Vanglaini a hrilh.

Inrinnia inthiar chhuakte bakah hian, August 14, 2015 khan chhungkaw pahnih an lo chhuak tawh a, August 14 leh 15-ah in pakhat ve ve khawtlangin an ṭhiahsak tawh a; nimina ṭhiah lehte nen in pariat an ṭhiat tawh a ni. Nimina in ṭhiah hnatlangah hian Hunthar Veng mipuite bakah, Vaivakawn leh Chanmari West aṭangin mi eng emaw zat an thawk chhuak a ni.

Lei khîkna hmun leh nimina in ṭhiata hnatlangte hi bialtu MLA, minister Lal Thanzara chuan nimin tlai khan a tlawh a; hnatlangte in leh in tur senso atan Rs. 10,000 a pe.

Thu dawn danin, Hunthar Venga lei tlahniam vang hian chhungkaw eng emaw zat awmna a him lo tih tun hma aṭangin Disaster Mangement & Rehabilitation department chuan an lo sawi tawh ṭhin a; a siamna atan sorkar laipuiin cheng vbc. 15 sênna tur detailed project report siama theh lut tura a tih chu DMR department-in mi thiam a neih loh avangin Shillong-a Geological Survey

of India mithiam chah an ni. GSI mithiamte hi vawiin hian Aizawl an lo thlen beisei a ni a, naktukah leilung awm dan a endik ang.