Kum 2 leh a chanve chhung copter-in CM ṭum 25 zinna senso Rs.18,55,000

Chief minister Lal Than-hawla chuan kum hnih leh a chanve chhungin Mizoram hmun hrang hrang leh state dang tlawh nan Pawan Hans helicopter hmangin ṭum 25 a zin chhuak tawh a, chuta sorkar sum senso zat chu Rs. 18,55,000 a ni. Helicopter-a CM zinna senso ziah danah GAD Aviation Wing leh Chief Minister's Office ziah dan inang lo a awm.

Helicopter-a Chief Minister official duty-a a zinna turah hian Gene-ral Administration depart-ment (GAD)-in thil ṭulte a buaipui ṭhin. January 2014 aṭanga May 2016 inkara helifopter-a Chief Minister zinna senso chungchang RTI Act hmangin CMO-ah zawh a ni a, chhannaah CMO leh GAD
aṭangin document hmuh a ni.

CMO tarlan danin, Chief Minister hi January 2014 leh May 2016 inkara helicopter-a
ṭum 25 a zinnaah hian, ṭum 21 chu Mizoram chhungah a ni a,
ṭum li chu Mizoram pawnah a ni. Mizoram páwna a zinnate chu - Vanghmun, Tripura; Haflong, Assam; Shillong, Meghalaya leh, Ukhrul, Manipur-te an ni.

Chhanna hi CMO-in an peih hnuah GAD Aviation Wing-ah an thawn a; CMO leh GAD Aviation Wing chhan danah a ni leh thla inmil lo a awm.

GAD Aviation Wing leh CMO lamin Aizawl aṭanga Serchhipa CM Lal Thanhawla zin ní 'Date of Flight' leh 'Date Travelled' tia an chhinchhiah danin, Serchhipah
ṭum thum a zin tawh. May 13, 2015-ah Eklavya Residential School hawnnaah a kal a, chumi ṭuma a zin ni CMO leh Aviation Wing-in an chhinchhiah chu a inang. July 15, 2015 (Nilaini)-a Serchhipa skill development training-te hnena hmanrua a sem leh hun a hmanpui ṭum pawh a inang a ni.

Serchhipa Puddy-cum-Fish Cul-ture programme-a a zin ni chhin-chhiah dan erawh a inang lo a; CMO-in August 6, 2015 tia an chhinchhiah laiin, Aviation Wing-in Aizawl-Serchhip tia an chhinchhiahah chuan August 8, 2015 tih a ni thung.

Kolasib-a a zinnaah pawh chhinchhiah dan inang lo a awm. CMO-in March 21, 2015-ah Sports Stadium lungphûmnaa tel turin a zin chhuaka a tarlan laiin, Aviation Wing lam chhannaah a lang tel lo a; Aviation Wing chhannaah chuan Kolasib-a kal ní chu October 28, 2014 leh October 22, 2015 tiin a chhinchhiah. CMO hian CM zin chhan an tarlang tel zel a ni.

East Lungdara Chief Minister a zin chungchangah pawh inang lo a awm. CMO chhinchhiah danah, November 3, 2015-ah East Lungdarah zinin, Biate Water Supply Scheme lungphûmin a kal a, November 3-ah vek a lêt leh. Avaition Wing chhinchhiah danah erawh chuan, East Lungdara a kal ní hi November 18, 2015 a ni thung.

Champhaia a zinna chung-changah, CMO-in April 26, 2016-a a zin chhan, 'Champhai Zotlang Stadium endik a, Inter Village Football Tournament final' a hmanpui thu an ziah laiin, hemi nía a zinna hi Aviation Wing-in CM zinna ṭum thum an tarlanah an tilang lo. Aviation Wing-in an chhinchhiah dan chuan, CM Hawla Champhaia a kal hunte chu - October 31, 2014, February 12, 2015 leh March 4, 2016-te a ni.

Hetih lai hian, November 23, 2015-a Sangau-a zinna leh November 24, 2015-a Lawngtlai aṭanga Aizawl a panna senso chu Congress party-in an tum thu, CMO chuan a tarlang. Chief Minister hi a zinnaah a nupuiin a zui avangin sorkarin sum a sen belh a nei lo tih tarlan a ni bawk.