Kepranah lei min vangin in 2 a chim

Kepran khuaah lei min vangin August 20, 2016 khan in pahnih a chim a, chenna in pakhat ṭhiah a ni bawk.

Kepran Branch YMA president Remsangliana sawi danin, Inrinni zing dar 2:30 vel khan D Lalhmunmawia te in chu an kawmchhaka lei minin a hnâwl a; lei a min an rin lâwk avangin thi leh hliam an awm lo a, bungrua erawh an chuh hman lo.

D Lalhmunmawia te in bula Lalrovi te in chu lei minin a hnawl leh hlauhthawnawma a awm avangin Inrinni khan khawtlangin an ṭhiahsak.

Lungawia te in pawh khawtlangin ṭhiah tur a nih leh nih loh an ngaihchàn laiin, Inrinni tlai dar 3:30 vel khan an kawmthlanga lei min vangin a chim leh bawk a; mahse, an bungruate an thiar chhuak hman thung. Lungawia te kawmthlang lama awm chhungkaw pangate pawhin an bungruate an thiar chhuak nghal bawk.

In chimte hi Kepran khawtlang chuan Inrinni khan an senghawi a ni.