KHAWTHLIR

Thisen pe

Inrinni khan Bethlehem Venglai Branch KṬP chuan an din champha pualin Aizawl Civil Hospital tan thisen unit 66 an pe a, a petute mipa 55 leh hmeichhia 11 an ni. Civil Hospital-ah hian Sialhawk Students Union-in thisen unit 13, Bawngkawn SAY-in unit 11 leh Záwngin Students Union-in unit sarih an pe bawk. Inrinni vek khan Venghlui Branch KṬP leh Aizawl Branch KTP inkawpin Aizawl Kohhran Hall-ah Synod Hospital tan thisen unit 57 an pe a, a petute mipa 53 leh hmeichhia pali an ni.

BCM ni pawimawh

Nimin Pathianni kha Baptist Church of Mizoram (BCM) ni pawimawh ‘Theological Education Sunday’ a ni a, Mizorama Baptist Kohhran biak-in tinah hun hman niin, thupui chu 'Pathian thu thil tih theihna' tih a ni.

ZEF khawmpui

Zoram Evangelical Fellowship (ZEF) Annual Convention vawi 41-na chu August 19, 2016 zan khan Vaivakawn Presbyterian Kohhran biak-inah ṭan a ni a, nizan khan a
ṭiak. ZEF Convention-ah hian thupui chu 'Pumkhat an nih theih nan' tih a ni a, speaker chu Rev.Dr Vanlalchhuanawma a ni. Inrinni khan nilengin ZEF General Body meeting-ah neih niin, thu pawimawhte an ngaihtuah.

Mei zu man

Kolasib District Anti Tobacco Squad-te chuan Inrinni tlai khan Diakkawn Bazar, auto-rickshaw leh taxi stand-ahte squad drive an nei a, phal lohna hmuna mei zu mi pariat an man a, dan angin pawisa an chawitir nghal.

Zirlai ti tha chawimawi

Saitual Jt. YMA chuan tun hnai khan Saitual V/C hall-ah kumin session-a university examination-a an khaw mi ti ṭhate chawimawina hun an buatsaih a, chawimawina hi mi 16 hnenah an hlan.